لطمية جرت العبرة مكتوبة
الرادود باسم الكربلائي
جِـرَت الـعَـبره وَانا حـاير
السما مِتغَيْره شنو صاير
واشجايب الزهراء
خل تحچي سامراء
شنو صاير
شِفِت بِعيون گلبي الضاگت اضلوعه
السما حَزنانه والأملاك مفجوعه
حزِن عن كل حزِن ظَل مِختلِف نوعه
البواچي اِمن الجنان ابحُرگه مسموعه
شنو اليستدعي كل هالحسره واللوعه
سِوىٰ موتة شخُص يم الله موضوعه
منو هذا اللي گضى نحبه
إِله يا رُتبه لَدىٰ ربّه
أسأل أريد اَنباء
خل تحچي سامراء
شنو صاير
الگلُب نَزَّلني سامره ابثگُل هَمَّه
شفِت نعش اْو چثيره اچفوف ملتمّه
گلِت منهو التِشيعونه اْو شنو إسمه
علي گالولي والله اشمكبَر الكلمه
گلِت من يا نَسَب گالوا نبي الرحمه
گلِت معصوم لو مِن مَنزِل العصمه
علي يا كِثره اِبـ بني هاشِم
رِدِت اَستَفهِم وَانا فاهِم
يمكن شَبَهْ أسماء
خل تحچي سامراء
شنو صاير
محامِل نور نِزلت والحزن حادي
اْو بعدني اْو ماعرفت اشصاير اْو سادي
لن مِن هالمحامل ثاكِله اتنادي
آه اعليك يبني يا علي الهادي
إنْ اِتسِئلوني حَنَّت كِلهُم اولادي
اْو مُصاب احسين هُوّه الماضي بِفّادي
إذَن الهادي الگضى عُمره
وِاجت الزهره على گبره
عن شِدّة الأرزاء
خل تحچي سامراء
شنو صاير
عُرَفت اْو گلبي صار ابصدري كالجمره
الإمام الهادي هذا النازل ابگبره
إمامي العاشِر الـ وَي غُربته عِشره
السبَب شنهو ابوفاته وانخسف بدره
السبَب لو ما فِعِل فاعِل گِصَد غدره
ما چا لُطمت الخد فاطمه الزهره
السبَب اِتوَضَّح وَلا يخفه
اِنغدر اِبسَمَّه اْو لِگى حتفه
من گطَّع الأحشاء
خل تحچي سامراء
شنو صاير
اِتّضحَت رُؤية الخافي اْو لِطَمت الراس
اعله شهگة فاطمه صرت اَشهگ الأنفاس
بلا شك هالغدُر دَيدَن بني العباس
يِغدرون الـ إله تِهوي قُلوب الناس
المُعتز أصبح المُنذل ولا نوماس
اِشحده اْو يجرح اِلبنت الرسول احساس
شِلَه وَي فاطم واهي تغضَب
غضَب الزهره غضَب الرب
شاءت مثل ما شاء
خل تحچي سامراء
شنو صاير
گبل سامره چانت فاطمه ابـ بغداد
اْو طوس اْو يثرب اْو تتفگّد الأولاد
لچن أفجع أرض بيها الدمع يزداد
أرض بيها بُگت جثه علىٰ الأوهاد
أعني كربلا اْو مَقتل أبو السجاد
يوم انشال راسه ابطارف الميّاد
الشِمِر ابرجله إجه داسه
اْو خِضَب الشيبه ابدِمَه راسه
هل عِدها عاشوراء
خل تحچي سامراء
شنو صاير
أويلي اعليها يوم الگطعوا المنحر
نَظرها اِليا كِتر يتوجّه ابها لبر
اهنا جثّه عظمها اِتسِمعَه يتكسّر
حدِر عَشرَة خيول اليمتطيها الشّر
اهناكه اخيام بالنيران تتوجّر
اْو چم طفله اْو طفِل بالركضه يتعثّر
الحَرَم اتدوّر على مَهرب
الزَجِر ايدوّر على زينب
عن قصة الحوراء
خل تحچي سامراء
شنو صاير
play_arrow
play_arrow
play_arrow
play_arrow
play_arrow
play_arrow
تعليقات