لطمية مر خريف افراقها مكتوبة
الرادود باسم الكربلائي
مَرْ خريف افراگها .. ابشجْرتي و أوراقها
او غصن أيّامي ذبل
ابوقفتي اعله المغتسل
مَرْ خريف افراقها
الصخَّره إخْت الگلب لو مات العشِگ
و النخل طرْگ السَّعَـف لو لا العثِگ
الخانگه الدخّان غير المحترِگ
المثلي لازم بالحزن روحه تطِگ
وآنا عفيه لهسَّه دلّالي يدِگ
و اشلعْوا زهرة حياتي امْن العِرگ
مِتت لو حيْ مدري ! .. او عمري فارَق عُمري
اغْسَلِت إيدي امن الأمَل
بوقفتي اعله المغتسل
مَرْ خريف افراقها
آنه أوّل رجل يدفنله بدُر
بدر طاح من السِّمه ابعز الظُهر !
بدر صار اهلال من كثر العصُر
بدر لاچَن بيْ خسِف وسط الصدُر
بدر من كثر البچَي اعيونه حُمُر
بدُر من حظن لسمه لحظن القبُر
البدر ما تَم ليله .. اشلون نعشه انشيله
و المتِن منّي انهِدَل
ابوقفتي اعله المغتسل
مَرْ خريف افراقها
آنه ذاك الشِلت خيبر عالمتِن
صحت يا زهراء و اكسَرْتِ الحِصن
او من وقفْت اعْله القبر وكْتِ الدَّفِن
رجْفَت إيدي اوبعد متْشيل الرِّدِن
زهرة الله اتموت مكسورة غصِن
ليش و اللّطمه أثرها اعْله الجفِن
اثمنطعَش أعوامها .. امهشمّين اِعظامها
شفْت الِمْصابْ الجَلل
ابوقفتي اعله المغتسل
مَرْ خريف افراقها
من عُقُب ما عصروا اقبالي الشَّمِس
ابعيني صار الكون يفتَر بالعَكِس
ابسجن رمشي دمعتي ما تنحبِس
او من ادموعي البير مايَه ينترِس
عله صدري من أحِط إيدي و أجِس
مدري وينه شو ابقلبي ما أحِس !
فتّشِت مثواها .. ثاري قلبي اوياها
قلبي وي دمعي نِزَل
ابوقفتي اعله المغتسل
مَرْ خريف افراقها
ذبحْوا الغُبشه او نشف ماي النِّده
او سِده اعليَّه الما على واحد سِده
عقُب ما چانت زهِرْتي امورِّده
هسّه ما بين لقْبور امَّدِّده
ريت جثْتي اوْيه الزچيَّه اموسَّده
او فدوه أروحن للّي راحتلي فِده
لو تعُود آجالها .. چنْت أموت ابدالها
أبچي و اعتِب عالأجَل
ابوقفتي اعله المغتسل
مَرْ خريف افراقها
اصفرَّت الدنيه او يبَس عُودي الخَضَرْ
العين ما تتسّمه عين ابلا نَّظر
ليش ملْچ الموت عن موتي انتظَر
و أنا عشْت الدنيا مثْل المُحتَضر
غير فضَّه لفاطمه محَّد حِضَر
او من مضُر محَّد إجه لفارس مضُر
وين هاشم وينها .. اتشيِّع امّ احسينها
خل يشوفون اشحِصَل؟
ابوقفتي اعله المغتسل
مَرْ خريف افراقها
طالت الفرگه لچَن خلگي گِصَر
او وحشة الزهره على مدِّ البَصَر
الدهر رايدني او على حَربي أصَرْ
او جيش أحزاني على صبري انتصَر
چلمه تطوي الفاجعه و بالمُختَصر
بين بابي او حايطي قلبي انعصَر
راح أضُم فقّاري .. للي ياخذ ثاري
صحت يالمهدي العَجلْ
ابوقفتي اعله المغتسل
مَرْ خريف افراقها
play_arrow
play_arrow
play_arrow
play_arrow
play_arrow
play_arrow
تعليقات