لطمية كسرها كسر قلبي مكتوبة
الرادود باسم الكربلائي
كَـسِـرهـا كِـسَـر گـلـبي
اِفگَـدِتـها اْو شنو ذنبي
الصبر ما وگف جـنبي ابعذابي
علي آنه علي ابكلشي اعـله كلشي مـعتلي عزمي
لچن من ماتت الزهره علىٰ عزمي اعـتله هَـمّي
مِن المسجد ركضت اِلها غِديت اَتعثّر ابـهِـدمي
تِكاد اِمن الفَزِع روحي تِصل داري گبل جسمي
ابركضتي چنِت أرجِف
دموعي ابرعُب تذرِف
أَجَلها اِستِغَل موقِف غيابي
دخلت اِلداري لن ألگىٰ الجمال اموسّد ابكتري
اِرفَعِت راس ام حسن بيدي اْو خليته ابوسط حجري
صحِت فِتحي جفن عينچ گبل ما عيني دم تجري
صِرَخت اِتنَفِّسي الأجلي گبل ما يختنگ صدري
أهزها اْو أحاچيها
وَلا ظل أمل بيها
اِسكَتِت لا أأذّيها ابعتابي
بعدني ابصدمة الفرگة أنوح اْو ما هِدأ رُوعي
الصبُر بالمُغتسل هَدني اْو طلع ياويلي عن طوعي
ابوكِت ماچنْت اَغَسّلها اْو أصُب وَاغرُف من ادموعي
إديّه ابچم ضلِع حسّت كسير اْو كسَّر اضلوعي
ابألمها اشكثر شالت
كسيره وَلا گالت
المصايب فلا طالت مصابي
شلِت جثمانها الطاهر وَاحسَّن بيدي جثماني
نزلت ابحفرة المضجع اْو ردِت يحضرني دفاني
تمنّيت اَبگىٰ ما أطلع وَلا تتركها ذرعاني
إلي والفاتحه عِشره اشعجب ثِگلَت على اِلساني
ابوجهّا اترسِت عيني
لچن ما يكفّيني
عساني يغطّيني ترابي
رجعت امرافُگ الوحشه اْو تراوه الباب جدامي
ذكرت العصره مِن شفته اِستِفَز آهاتي والامي
القِلع خيبر رِجَف چفه اْو يحيف اندارت ايامي
اليصدلي اِبّـيتي يلگاني يتيم ابّين أيتامي
الزوايا غِدت صفره
الأماكِن بلا زهره
بُگتلي أشد ذكره اعله بابي
أحس من شِدّة الغُربه كأنّي بالحرُب وحدي
الزمن والدنيا وَاعدائي واحس حتى الصبر ضدّي
چنِت من كل حرب أرجع تِضمِّد كل جرح يِدّي
افگَدِت لمسة عطُف چفها نِزَفت اْو لا ضُمد عندي
أثرها على اجروحي
اِبفگِدها افگدِت روحي
فِقاري بِچىٰ اِلنوحي اْو حِرابي
صبُر غير الصبُر جبته صبُر ما تعرفه الدنيه
النبي لو چان ما وصّىٰ فَلا نُطفة رجس تحيه
المؤرِّخ عن حرب داري يِسطِّر بالكتُب حچيه
البَسوس اَجعلها شي عابِر السِّيَر عن كل حدَث عميه
أخلّي الرعب أحمر
الوديعه فلا تنضَر
يِخَلِّد حرُب حيدر ضِرابي
ابشعوري الله بس يدري الوصيّه شَلَّت اَعضائي
لأوّل مَرّه كِسروني اعله دمعي ضِحكوا اَعدائي
صرِت مِن شدّة الكَسره ألَملِم بيدي أجزائي
حياتي اشلون اَعيشنها وحيد ابلايه زهرائي
انتظاري الشَمِل يلتَم
اْو يجيني إبن ملجَم
ابصلاتي يصير الدَّم خضابي
play_arrow
play_arrow
play_arrow
play_arrow
play_arrow
play_arrow
تعليقات