الشاعر : الأدیب ناظم الحاشي

 

 راح اعترف للناس عن حبي
واسم الحبيب الينبض ابگلبي
خليته كل عمري
طير ابقفص صدري
راح اعترف للناس عن حبي

******
يم ساحل الحب رست مرساتي
نورس وادور عن بداياتي
آن الأوان أبدي اعترافاتي
عن بوصلة گلبي ومساراتي
لا مو بشر حبيته من ذاتي
كوكب نزل من رب سماواتي

اربع حروف ابكثر ماحبها
يمسحها دمعي وارجع اكتبها
عاشگها من زغري
طير ابقفص صدري
راح اعترف للناس عن حبي
******
من ابدي بسمه حروف سالفتي
تتزاحم انجوم السمه بشفتي
مامر خريف ابشجر عاطفتي
لو حبه غادر زمن ذاكرتي
يكفيني ماشالت ذنب ذمتي
لمن تربته لامست گصتي

مثله وكيومه ماشفت مثله
للقبله قبله اختارته القبله

عالم بما يجري
طير ابقفص صدري
راح اعترف للناس عن حبي
******
بحروفه اردد طفل خلاني
چن عيسى دار السانه بلساني
كل الخلايا الملت شرياني
ترفض فصيلة دم عشگ ثاني
طير ابتعد وبصحنه تلگاني
چن گلبي صار ابريش جنحاني

اليدخل ضريحه يشعر ابنفسه
متغطي ويه اهل الكسه الخمسه

في ليلة القدرِ
طير ابقفص صدري
راح اعترف للناس عن حبي
******
اسمه الحسين الروحي عاشگته
ومطفي ناري ابماي عاطفته
واسمه الحسين اول حزن عشته
وابگلبي ناصب عمد فاتحته
واسمه الحسين الابد ماعفته
وحبيته واني بعمري ماشفته

من عيني لجله مو دمع نازل
ماي ونزل من جربة الكافل

بسمه انشغل فكري
طير ابقفص صدري
راح اعترف للناس عن حبي
******
طير النبوة الربته الزهره
خلا علي ابحرمة قفص صدره
لو قبلت خاشع ذهب گبره
كل گصدي ابوس حسين من نحره
عاشوره ضل كل جيل ينتظره
من تطفى جمره تشتعل جمره

قرآنه ضل آيات مهجوره
لو ماتلزمه اچفوف مبتوره

رب العرش يدري
طير ابقفص صدري
راح اعترف للناس عن حبي
******
ماعندي قدره تكتم آلامي
واتخيله ايذبحونه جدامي
واصبر محال اوجثة امامي
احمر صبغها منحره الدامي
واتمنى موتي ايصير بصيامي
حته افتهمها موتة الضامي

اتمنه اموتن كون الف موته
ولا اسمعه بلطف مختنگ صوته

وامخضب ابنحري
طير ابقفص صدري
راح اعترف للناس عن حبي

تعليقات

لإرسال تعليق یجب أن تسجل في الموقع

لطميات

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x