لطمية لو فرض مكتوبة

 

الرادود باسم الكربلائي

 

 

لو فَرُض نازِل جهاد إعله المَره
يُمكِن أم عَبّاس تِقلَع خَيبره
واجِب إدَنّگْ الرِجال
للمَره التطلَگ جِبال
لاتِعِدهه إعله النساء لَمَّن تِعِدهه
يامَره الجابَت وِلِد تِشبَه وِلِدهه
إيدهه الرب العَرِش لَمّن تِمِدهه
شي أكيد الشَمِس هَم تِگدر تِرِدهه
يُمكِن العبّاس من عاف العَرين
چان قاري الفاتحه الأم البنين
هالسَبَب سَوّه المُحال
للمَره التطلَگ جِبال
علي إوما يختارهه إبهذا إختياره
لومَه جبرائيل قدّمله إستشاره
إتجيب أخ لحسين مَتلِحگه الغَياره
ينطي نحره إويمنِته إوينطيه يَساره
روح إخِذهه إو رَبّك إيبارِك بديك
بِت حُزام الثوب المفَصّل عَليك
جمعَت أوصاف الكَمال
للمره التطلگ جبال
ينوِلِد مِنها الكفيل البي حَميّه
اليمسح إبچَفّه الدموع الزينبيّه
بَعده بگماطه إوصِرخ بسم الزچيه
يالثارات الضلوع الفاطميه
رَبها من إختارهه الهيچ إختيار
ينولد لحسين رايد ذو الفقار
مُعجِزَة سوح القِتال
للمره التطلَگ جِبال
هاي أم الما كِسَر بالطف كَلامه
مو الجيش. الريح ماوصلَت خيامه
نازِل إبروس الزلِم سيف إنتقامه
أشَد من نار الحشُر يوم القيامه
هذا سَبْع إحسين سَبْع الگنطره
وَحدَه چان الميمنه والميسره
هذا واقع مو خَيال
للمره التطلگ جبال
گالو إثبِت عن كلامك من تگوله
إشلون تتوصَف مَره إبروح البطوله
گِلت گولو أم البنين إبكِل سِهوله
بالمباشِر ينتِشِر عِطر الرجوله
كِلشي مِن عِدهه عَظيم أتوَقَّعه
هاي إبِنها الكِسَر خَشْم المَشرَعه
زَلزَله إبيوم النزال
للمَره التطلَگ جبال
كِل مِسيتْ إغروب مَرفوعات إديها
تدعي كون أم الحسَن تِقبَل عليها
مو على العباس وإخوانه بَچيها
تبچي چي ماشارِكَت زينب سَبيها
خَجَل تبچي مِن علي إومِن النَبي
إشلون ماتنسِبي إو زينب تنسبي
خَجَل من هذا السؤال
للمره التطلگ جبال
مِن كِثُر ماخِدمَت إبّيت الرساله
مِن تِشوف إحسين تِتوَضّه إبخَياله
مو إتقَدِّمله أربَعه الساحَة قِتاله
لو بديها الموت چا ماتَت بِداله
مو سَهِل يختارهه الرَب للوَلي
لومَه بالذَر چان خالِقها العَلي
عَنها تِستاهِل يُقال
للمرَه التطلگ جبال
رَبها خالِقها العَلي إوما خِلَق مِنها
إو بَصعَب أيّام إمتحاناته إمتِحنها
غيرَة الله إندارت إبغيرَة لِبَنها
إل هالسبب أم البنين إنگال عَنها
هاي بَس هيّه شَبيهَةْ بِت أسَد
علي الثاني المِنها عباس إنوِلد
علي الثاني إبلا جِدال
للمره التطلگ جبال

 

تعليقات

لإرسال تعليق یجب أن تسجل في الموقع

لطميات

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x