لطمية اسئلة الحروب مكتوبة

 

الرادود محمد الجنامي

 

 

كل الحروب اجمعت تسأل وهي تودعك
انته علي لو مو علي ليش اختلف وضعك
جاوبنه نتوسلك ••• منهو الكدر يوصلك
 
كل فرد بالبشر يلتقي ابمصيره
الوصي المرتضى ليلته الاخيره
كبل لا يجي الموت وتنقبض روحه
اجت يمه الحروب وجايبه سوحه
ابخرابه الأسئله هالليله مطروحه
واعيون المعارك يمه مفتوحه
اول حرب وصلت اله وبعلومها اتضيفه
كالت انه وقعت بدر واتعاين السيفه
صاحت اجيت اسألك ••• منهو الكدر يوصلك
 
يم علي المعركه نزلت ابحملها
من بدر نستمع اسئله البطلها
تكله ياعلي وقعت بدر انه
اسمعت بيك اوكعت لو انه غلطانه
جم فارس ابفارس تخطف الوانه
اشوفه انخطف لونك صرت حيرانه
ليهسه اذكر يا علي بيه اشصنع سيفك
فرسان يمك دنكوا كالولك ابكيفك
خسران الينازلك ••• منهو الكدر يوصلك
 
هذي احد حايره وتنظر المصابك
تسألك ياعلي وتنتظر جوابك
درت المعركه وماكدرت اتديرك
حتى الموت وجها انكلب تصويرك
هتف جبريل لمن شاف تدبيرك
لا سيف الا سيفك لا فتى غيرك
شو هسه سيفك ياعلي متمدد بصفك
يبجي عليك وماكدر يتناوله جفك
سيفك بجي امكابلك ••• منهو الكدر يوصلك
 
الخندق اتسائلك ياعلي اعرفتني
وحدك قاتلت وحدك خضتني
ابن ود ياعلي اعله الكاع طيحته
اذا هسه يجي ايكول انته مو انته
يل امسكت الاحزاب شعجب شو سكته
حتى الرمح يمك لزم خاصرته
ياعلي مو انته الذي ايطيحك ابن ملجم
عمر ابن ود من كابلك ظل بالحجي ايلعثم
مستغرب المقتلك ••• منهو الكدر يوصلك
 
الباب اجه الخيبري ينظر ابغرابه
طايح ايعاينك لكن ابكئابه
يكلك يالشطرت ابطبرتك مرحب
ليش الوجه اصفر راسك امعصب
انه الجنت بيه ابيمنتك تلعب
اسئلك ليش طايح ليش تتكلب
لليوم احس ابقوتك جريتني ابحيلك
شنهو الجرالك ياعلي واتريد اليشيلك
جف الأجل شايلك ••• منهو الكدر يوصلك
 
ياعلي صارمك بالحجي يشارك
شايله ابيمنتك انته بالمعارك
يكلك يمن جفك بي امطوكني
حجي هاي المعارك حيل خانكني
صدك ناوي يبو الحمله تفاركني
من بعدك يريت الموت يشركني
ايامي تخلص ياعلي لو خلصت ايامك
فقارك انه واتحسب واحد من ايتامك
بغيرك فلا ابدلك ••• منهو الكدر يوصلك
 
جاوب المرتضى ابونته الخفيه
ابهالأمر كل نفس ذائقه المنيه
هذا الصار بيه ابحكمة الباري
ولكن يالمعارك تبقى اثاري
باجر ارجع وبيميني فقاري
ومن اهل الضلاله اخذ ابثاري
ابحكم العدل بين البشر احكم انه و ولدي
و دولة العدل المطلقه تبتدي من المهدي
وايكلي كلمن ملك ••• منهو الكدر يوصلك

تعليقات

لإرسال تعليق یجب أن تسجل في الموقع

لطميات

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x