قصيدة : لا والله
الشاعر : السيد عبد الخالق المحنه

الرادود : الحاج ملا باسم الكربلائي
المکان : مسجد المرحوم الحاج علي باش
المناسبة : الليالي الفاطمية ، ليلة 24 جمادى الأولى 1442

 

لا والله جفك ما حجب نور الإمامه
لا والله.. تباً للحياة إبلا كرامه
إسمع ما يلي .. ما أترك علي
لا والله
******
انه زهرة محمد و امه والبضعه
عدا صوت الوحي اي صوت ماسمعه
تظن اترك علي بالعصره والصفعه
واسميك الخليفه ونهجك انتبعه
ما اطخ راس .. راسي بي علي ولازم ارفعه
ما اطخ راس .. لا مو بس ضلع نحري اگطعه
واحرگ منزلي .. ما اترك علي
لا والله
******
اليبيعون الشرف لازم يرخصونه
الصگر يشوونه ناس الما يعرفونه
الذهب لهل الذهب همه يقيمونه
يسومونه ابتراب الما يقدرونه
هذا الصار .. ما يعيش الورد ويه المخالب
هذا الصار .. ينگاد الأسد بيد الثعالب
عاهدت العلي .. ما اترك علي
لا والله
******
حدود الله بيتي يالعبرت الحد
تريد الرد يرد يا مرتد المرتد
مثل وجهك فعالك اسود بأسود
تظن هذا هجومك يرهب الاصيد
ادفع باب .. وحسين وحسن خلاهم يتامه
ادفع باب .. دين الله المهم يبقى بسلامه
واقتل كل هلي .. ما اترك علي
لا والله
******
علينه النار يبن النار توگدها
وأدين الدافعت عنكم تگيدها
منو جان الكتايب وحده يردها
وراه تمشي وبخاً وبخاً ترددها
تنسى شلون .. وانت بكل حرب سيفك تشمره
تنسى شلون .. لكن بس على الزهره تشهره
يمگيد الولي .. ما اترك علي
لا والله
******
جهل واتجاهلت يا أجهل الاجهل
عرفناك الأخير شقدمك اول
شبه شبه الرجال وگيدت أرجل
عمت عين الرجال الهاجمت اعزل
وين تروح .. لو دمدم علي وجرد حسامه
وين تروح .. تشرد لو تجر اذنك ندامه
رد يا قاتلي .. ما اترك علي
لا والله
******
اذا شفت الردي بكرسي الحكم يحظى
اكيد الناس هاي عقولهم مرضى
الذليل بأي حكم يتعايش اِو يرضى
فقط راعي الكرامه يعلن ابرفضه
ما مقبول .. حكم الظالم الخاين عهوده
ما مقبول .. مايحرس شعب يحرس وجوده
صوتي يعتلي .. ما اترك علي
لا والله
******
بقت كلمه يظالم ردت تفهمها
اموت اِو رايتي الحوراء تلزمها
حرگت الباب وابنك يحرگ اخيمها
قلاع اوهامكم زينب تحطمها
زينب هاي .. بحبال السبي وترسم قضيه
زينب هاي .. كد كيدك تزلزل عرش اميه
صه يا جاهلي .. ما اترك علي
لا والله
******
بعد كلمه اكلك وادري مو قابل
يروح المحسن يجيلك ابو فاضل
اذا شد عالنهر صاحوا خبر عاجل
كأن جف الاله اعله الأرض نازل
والعباس .. يم المشرعه ينهي السقيفه
والعباس .. يطويكم مثل طوي الصحيفه
وعده الاولي .. ما اترك علي
لا والله
******
بعد عندي خبر من جملة اخباري
يجي القائم المهدي وياخذ بثاري
واگله الضلع هذا وهذا بسماري
يگص اقدام كل واحد وصل داري
راعي الثار .. يقتص منكم ويرفع لوانه
راعي الثار .. والگلي وإن يگطع لسانه
ويردد إلي .. ما اترك علي
لا والله

تعليقات

لإرسال تعليق یجب أن تسجل في الموقع

لطميات

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x