القصيدة : هالليله أودعج
الشاعر : ناظم الحاشي

الرادود : الحاج ملا باسم الكربلائي
المناسبة : الليالي الفاطمية 1442ليلة 28 جمادى الاولى 1442
المكان : الحسينية الفاطمية الديوانية

هالليله أوَدعِچ لَيلَة القَدري
هالليله آخِر ليله من عُمري
وَأصبُر وطيع أمرِچ
وَأخفي أثَر گَبرِچ
هالليله أودعِچ لَيلَة القَدري
******
يا رحمَة الله ال بالگلب عِشتي
ما تِحله إلّا وياچ سالفتي
إي والجَعَل موتِچ سَبب عِلتي
فاطِم مَلَكتي الروح بس إنتي
بِحسابي چان اوچان كِل ضِنتي
إنتي العَلَيْ تقرين فاتِحتي
مِن وَدّعيتِچ وَدَّعِت روحي
وجروحي تِشعِل نار بجروحي
ماينجُبر كَسرِچ
وأصبُر وطيع أمرِچ
هالليله أوَدعچ لَيلَة القدري
******
شِلّي إبحياتي إوعُمري من دونِچ
والله خلقني الخاطر عيونچ
وآني علي الماخَيّب إضنونِچ
لومه الوصيّه مايمرّونچ
كِل الرِگاب إتهون من دونِچ
وإباب بيتِچ مايعصرونِچ
يالزهره طبعي باليمِس داري
ياخِذ جَزائه إبسيف فقّاري
سيفي اليرِد قَدرِچ
وَأصبر وطيع أمرچ
هالليله أودعِچ ليلة القَدري
******
كون آني مَيّت هَسّه يالزهره
چاشفتي حاله الينكسر ظهره
لو حِضَن خِلّه إونَزِّله إبگبزه
يتمَنّه عُمره إيبَدِّله إبعُمره
والأصعب إمن إيعود من سَفره
إوما يِلگه ذاك الچان ينتظره
وَصعَب مصيبه ضَلّت إبالي
بيت النبوّه إمن الشمس خالي
فاطِم عَظيم أجرِچ
وأصبر وطيع أمرچ
هالليله أودعچ ليلة القدري
******
والأشَد وَصعَب بَعَد من ذَنّي
لَمّن عليچ إحسين يسألني
والحسن ينشدني إويوِن وَنّي
خاف أُمّي زعلت مِنك إومِنّي
يالزهره ذَنّي أحداث مَرّني
ماچَن علي الكرار سَوَنّي
وآني القِلَعت أبواب خيبرهه
كِسرَة خُبِز ماگادر أكسرهه
عُمري فِده العمرِچ
وأصبُر وطيع أمرِچ
هالليله أودعِچ ليلة القدري
******
يالزهره بَعدِچ شِلّي بأيًامي
وآني إبدَفِنتچ دافن أحلامي
رمضان عُمري إوماي للضامي
وِشلون أتَمِّم دونچ إصيامي
دعوات إديچ إودمعچ الدامي
يادرع صدري اليشگُف إسهامي
من تنرفع چَفّينِچ إبدعوه
باب الاجابه ياخِذ الفَتوه
هذا الفَخَر فَخرِچ
وأصبُر وطيع أمرِچ
هالليه أودعچ ليلة القدري
******
يالزهره گولي شلون أطُب ليها
وارجع الداري وانتي موبيها
وشلون زينب تبچي ألاگيها
عنِّچ شَگِلها إوشَرْد أحاچيها
يانار گلبي بيش أطَفّيها
من أبچي يَم زينب وَبَچّيها
حَتّه الطيور الفوگ شِجرتها
مِن تبچي تجري وياهه دمعتها
ماذيها ياهجرِچ
وأصبُر وطيع أمرچ
هالليله أودعچ ليلة القدري
******
ماعندي غيرِچ واحِد أشكيله
اوغيرچ منو اليستاهل أبچيله
يبچي الحَسَن يازهره گوميله
يَم الگبُر سهران لوليلَه
وإحسين يَم الخالق إدعيله
يتقبّل القُربان گِلّيله
يالزهره زينب تجري دَمعَتها
أُم الأبوهه أصبَحَت وِإخْوَتها
صُبرَت مِثِل صَبرِچ
وأصبر وطيع أمرچ
هالليله أودعچ ليلة القدري
******
للقَدَر بعدچ سلمت أمري
وباب الكسر ظلعچ كِسَر ظهري
وياي بعدچ مارحم دهري
بالصبر موتي اومحتمل صبري
يَم الحَسَن ماينجُبُر كَسري
مادام گبرچ هذا مو گبري
من طفت نارِچ ضَل غضب ثاري
يالزهره يلهب نار بأكتاري
يشعِل لَهَب جَمرِچ
وأصبر وطيع أمرچ
هالليله أودعِچ ليلة القدري

تعليقات

لإرسال تعليق یجب أن تسجل في الموقع

لطميات

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x