اسال عليه

قصيدة : اسأل عليه
الشاعر : السيد عبد الخالق المحنه

الرادود : الحاج ملا باسم الكربلائي
المکان : حسينية وهئية الصديقة الطاهرة الحمزة الشرقي
المناسبة : الليالي الفاطمية ، ليلة 4 جمادى الأخرة 1442

إسأل عليه او ما يضيع العنوان
تلگاني شمعه من جماد لرمضان
و اِسأل عليه اِبعاشور
تلگاني ظامي اِو منحور
******
تلگاني مبحر بالحزن
و شكم سهم بشراعي
ناس التحب والما تحب
يرويها بحر إبداعي
بعيوني زمزم ما يجف
يجري اويَ صوت الناعي
اْو زينب مدامعها علگ
ما يوكع امن اِذراعي
يشتاگ الي المنبر اذا صار افراگ
ويكلي وينك و لونينك مشتاگ
كتله الزمن خل ايدور
تلكاني ضامي او منحور
******
تلگاني عالمنبر دمع
ما تختفي آثاري
صح اني شيبني القهر
لكن جديده أفكاري
أتفنن ابنوع الحزن
و بناري أشعل ناري
ما انهي مشواري ابلحد
بل للحشر مشواري
من تسمع الظالم حرگ باب الدار
تلكاني ما بين الضلع والبسمار
إنصفني لتظل مغرور
تلكاني ضامي او منحور
******
تلكاني بدروب السفر
دوم أنتظر غيابي
مره ابسفر مره ابقهر
مره ابسهر و عتابي
بين الإجو والما إجو
ضاع العمر يم بابي
لا آني ميت بالهجر
لا اني شفت أحبابي
لا دمعي ينفعني أو يرجعلي الراح
لا اني ميت من هجرهم و ارتاح
هذا الزمن من ايجور
تلكاني ضامي او منحور
******
ما فاركتني النايبه
كل يوم أودع غالي
بين الأون بين الحزن
بين السجن وغلالي
سم اليبغضون إهدعش
مره كطع دلالي
كل عمري عايش باليتم
جم مره فاكد والي
تلكاني شيبه والحكم للصبيان
تلكاني صايم ونطبر بالآذان
من تلكه مصحف مهجور
تلكاني ضامي او منحور
******
يوميه بابي يحترگ
جمر الحقد يلسعني
يوميه خنجر للغدر
من الظهر يطعني
يوميه مكسور الوجه
اعله الوجه يصفعني
تلكاني كل يوم انعصر
والظالم ايروعني
يوميه يجرحني نذل يا هالناس
يوميه انسب والسبب ما اطخ راس
يوميه ضلعي مكسور
تلكاني ضامي او منحور
******
تلكاني بالعاشر طفل
ضامي أو أصيح إسگوني
تلكاني واكع عالنهر
و على الخيام اعيوني
تلكاني خيمه أو أحترگ
بس وين اليطفوني
ظلت حوافرهم ترض
صدري ولا عافوني
ل اتسأل اعليه الحقود الخسران
إسأل عليه العنده غيره او وجدان
إسألني ياخد مسطور
تلكاني ضامي او منحور
******
تلكاني عايش بالسبي
او سوط الشمر بمتوني
عرفوني ألعن كل صنم
و لهالسبب شتموني
الله خلقني اعله الجبل
و اهل الحفر حسدوني
سمعوني صوت امن النحر
بس عجزوا ايسكتوني
تلكاني جون او ما عرفت التقصير
تلكاني عابس من يصير التطبير
والما عرف مامعذور
تلكاني ضامي او منحور
******
تلكاني كل جمعه انتظر
ودموعي تچوي الجمره
بلكت ابو صالح يجي
يطلب بثار الزهره
ثار الخدر ثار الطفل
ثار اللي حزوا نحره
من يلزم الرايه ابزعل
كسر الزجيه ايجبره
من ينكشف سر القبر للزوار
تلكاني خادم مستعد ليل نهار
اخر خبر من تزور
تلكاني ضامي او منحور