شبل حيدر

حي ابوفاضل ركب ميمونه...شبل حيدر درة المكنونه
* * *
حين ابو فاضل على الميمون لاح...ملك قبـض ارواحها او بيمينه لاح
امهنده وبالحصد بالهامات لاح...ومن زرگ رمحه الجثث مطعونه
* * *
بالاعنان الخيل يتعثرن غدن...إجسوم والارواح من غـدهن غدن
ظنت الفرسان متصابح غدن...الموت عند اعنانها ايشوفونه
* * *
حاسها وذب الجنح فوگ الگلب...لاجت وكل فرد مرعوب الگلب
وكل عجيد المن على سرجه گلب...انگلب فوگ الگاع ويعيفونه
* * *
ما نگل حران جدمه ولاخطه...وما تحرك سيف منها ولاخطه
بس ابو فاضل ابطعنه لاخطه...يعين الطاغي ويصب طاعونه
* * *
لو ثگل صفگ السمر فـوگ الصفاح...واتصافح بيضها وبيض الصفاح
الغوث أمي اتصيح والعف والصفاح...من شبل حامي الحمه ايطلبونه
* * *
شبه صل الرمل من صلها وصل...ابزوده راعي الجود للشاطي وصل
والگرب حده غده ابسيفه وصل...امشكر وبالگنطرة ايعرفونه
* * *
ترس چفه الشهم حين اللي ورد...وذكر چبد حسين ظامي وما ورد
حمل جوده ولاح ميمونه ورد...للاطفال البالخيم يتنونه
* * *
رد عليه اردود حزب الكفر چل...النـوب چلچل هامها چل بعد چل
وصارت العگبان مرعه الها او چل...اجسومها الفوگ الارض مرهونه
* * *
غارها ودمر الخيل وبيها حاس...وشچل من عـدها اللسن واخمد الحاس
الكل عليها انغشه ولا ظل بيها حاس...حامها اعله الموت تربي اعيونه
* * *
آه لـو آمر الحرب بيده يسر...من اخوه احسين چامنهو اليسر
لعد حده وگطع يمناه ويسر...وراسه ابعامودها ايفضخونه
* * *
من سگط عالتـرب من الچبد جار...حسرته وناده يابن حامي الجار
خويه ما تدري اخوك اعليه جار...دونك العدوان ويخذمونه
* * *
حضر عنده حسين للبتار سال...وانحنه اعله الشهم والدلال سل
ناده خويه ودمعه فوگ الوجن سال...إعداي هذا اليوم يتمنونه
* * *
يعباس الكفر طال إلها الغضه...حين جفنك غمض وشخصك غضه
وآل هاشم ذابـت ابجمر الغضه...اچبـودها وللصبر يتمنونه