لطمية ثورة شرف مكتوبة

 

الرادود باسم الكربلائي

 

 

ثورة شرف .. والدم هتف .. يحيدر
مر الهظم .. ما ينهظم .. يحيدر
من تحكم اللئام .. يتسيد الظلام
يحيدر .. يحيدر
انه الزهره وكلام الزهره دستور
اليعيش بلا كرامه يموت مدحور
اليطخ راسه بمذله يصير ناعور
ولا يطلب بحقه الوجه مكسور
اذا شفت بحبل مچتوفه الصگور
اكيد الوطن صار ابلايه ناطور
مهما حصل .. لازم تظل .. كرامه
ضلع وطفل .. فدوه لأجل .. كرامه
وبغيبة النظام .. يتسيد الظلام
يحيدر .. يحيدر
يشيعه الحرگوا الباب ويشتمون
خذوا محسن وضلعي وسطرة عيون
لچن الاكثر واكثر يألمون
الشافوها الجريمة وما يفزعون
قسم منهم يضحكون ويشجعون
وقسم اخر يخافون ويسكتون
واليسكت هذا الفعل .. مثلهم
والما غضب .. والما شجب .. مثلهم
من يختفي السلام .. يتسيد الظلام
يحيدر .. يحيدر
اذا شفنه الثعالب تحكم الغاب
نگول الدينا مالت والأسد غاب
واذا عار الزلم يهجم عالحجاب
اكيد الثاني يگدر يحرگ الباب
عجيب أصحاب أمس هاليوم أجناب
صرت مثل الفريسة ابين الأذياب
وانه اطلعت .. وحدي وصحت .. خيانه
يهل الجهل .. هذا العمل .. خيانه
وبغيبة الأمام .. يتسيد الظلام
يحيدر .. يحيدر
رحت محتجة وانه براسي قران
اواجه طاغية وبراسه شيطان
انه منهو الكتلني فلان وفلان
كتلني الينزعج من صوت الأذان
كتلني الباع دينه وصار سلطان
كتلني العاف ربه الخاطر اوثان
والما رضى .. بالمرتضى .. خليفه
عاش بوهم .. خله الصنم .. خليفه
من حللوا حرام ! .. يتسيد الظلام
يحيدر .. يحيدر
أريد إرضاة ربي مو رضى الناس
انه براسي علي وما ادنگ الراس
انه بچفي أشوف چفوف عباس
وانه بحضني رقيه ونبرة إحساس
تره فشلة عليهم بيتي ينداس
لون عدهم ضماير بابي ينباس
يالناصبي .. باب النبي .. حرگته
موقف نذل .. ناكر فضل .. حرگته
لو ضاع الاحترام .. يتسيد الظلام
يحيدر .. يحيدر
اكو هوايه اليحسبوهم على الاسلام
لچن بالواقع يعبدون الأصنام
لأن الناس تسكت عن الأجرام
تظل الدنيه بيها هوايه ظلام
انه وزينب نظل خيمه على الأيتام
واكيد الما يحبنه يحرگ إخيام
شبه الزلم .. صارت زلم .. علينه
حتى الشرد .. صاير أسد ..علينه
وبغيبة الكرام .. يتسيد الظلام
يحيدر .. يحيدر
شفت حيدر غريب وقلة انصار
طلعت من الخدر وبصدري بسمار
صحت لبيك يا حيدر يكرار
انه درعك وأطفي النار بالنار
شريف البايعك والخالفك عار
خليفتهم عبد و اولادنه احرار
والقانعة .. والتابعة .. قدرهم
ماكو ندم .. تحت القدم .. قدرهم
رادوا بالانتقام .. يتسيد الظلام
يحيدر .. يحيدر
عتابي على النحبهم ليش ينسون
وبعد شو للمجالس ما يحضرون
تره الما مشوا ويانه يضيعون
انصحكم يشيعه لا تبعدون
تره بهذي مجالسكم تربحون
توحدون الصفوف وما تخسرون
طول الدهر .. للمتتظر .. دعائي
ينصر علي .. وشيعة علي .. دعائي
ما يقبل الهمام .. يتسيد الظلام
يحيدر .. يحيدر

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x