اسأل واريد جواب

قصيدة : اسأل واريد جواب
للشاعر : عمار هليل الواسطي
الرادود : الحاج ملا بلاسم الكربلائي
 المناسبة : ليلة 16 محرم 1441 هـ
المكان : حسينية الحاج داوود العاشور البصرة ابو الخصيب

أسأل وأريد إجواب يهل الحميّه
أوصل أميره شلون واطلع سبيّه
******
زينب يمن تدرون من هيّه زينب
جار الزمان إوياي گلبي تعذّب
هيچ بحبل أنگاد هالحاله تصعب
بت حيدر الكرار وأمي الزچيه
******
إخواني مذبوحين لا مو قليله
خطواتي ممشه الموت كلش ثگيله
كلفه أركب ويا حيف فوگ الهزيله
كفّالي مو ويّاي شيصح بديّه
******
حيرني دهري بهاي والحيره ويّاي
مرّه التفت عالروس مرّه اليتاماي
يصعب طريق الشام شيحمله ممشاي
عيون الشماته سهام ترمي عليه
******
ديرة غرب وأحزان صارت بالأنفاس
لا يمي أخويه حسين لا يمي عباس
شعنده الزمن شيريد وشتطلب الناس
أصبر واگول تهون علتي الخفيه
******
كل لحظه أصد الراس ما بين إخوتي
أتجرع الحسرات وأتمنى موتي
حتى البچي ممنوع لكن سكوتي
فوگ النحيب يزود والبيّه بيّه
******
تتجاسر العدوان حال أرده من حال
مو بس على النسوان حتى اعله الاطفال
نيتهم ارض الشام گادونه بحبال
آه يا عذاب الشام والغاضريه
******
بس العليل إوياي نتشارك الهَمْ
واعله العوالي بدور متخضَبه بدم
مهضومه أنا من يوم عاشر محرم
خواني والأنصار راحو سويّه