حبيتكم

قصيدة : حبيتــكم

️للشاعر : الحاج حمزه السماوی

الرادود : الحاج ملا باسم الکربلایی

حبيتــكم . حـب ما إلـه ثـاني
حبيتــكم . من گلبـي ولسـاني
حبيتــكم . بجنـون عقـلاني
حبيتـكم ..
******
ياهو گال الگلب مايگدر على اثنيـن
آنه گلبي عاشگ العباس وحسيـن
بوقت واحد افتخر حبيت مرتيـن
صح اسافر جسد لكن يمكم العين
ناديتكم . من النفس اقرب
ناديتكم . بگد مابچت زينب
ناديتكم . من صار وجداني
حبيتكم
******
عمري يمكم يخلص وبيكم عزائي
مو شرط مو كربلاء الكربلائي
اعظم آيات الرجوله في بكائي
مشترينا ابدمكم الغالي دمائي
خليتكم . مثل الحرز عندي
خليتكم . من هسه للمهدي
خليتكم . وحبــكم الخلاني
حبيتكم
******
البيده ماس اشما تگول الناس جمره
مايهدها لإن هوه اشبيده ادره
بگلبي تبقه امنياتي وعندي حسره
وجـوهكم بالطيف اشوفن ردت مره
بوجوهكم . لوصارت عيوني
بوجوهكم . الوادم يحسدوني
بوجوهكم . ألوان ألواني
حبيتكم
******
نـاح يعگـوب ورجع شوفه ابـملابس
وآني يرجع شوفي من أحضـر مجالس
ابگلبي إحسب من تجي ثنين العوابس
عابس حسين وأكو العباس عابس
مجنونكم . بس العقـل شايل
مجنونكم . ساقيني ابوفاضل
مجنونكم . والنوح قرآني
حبيتكم
******
الما يعرفك مايثمنك گالوا الناس
وانه اعرف حبـكم اشگد يرفع الراس
ابحاجتي ما ادگ غير ابواب عباس
من حسين أطلب شفاعة لآخــر انفاس
وياكم . ماعندي كل غايه
وياكم . وكل وادم ويايه
وياكم . تتقدر أثماني
حبيتكم
******
الدنيا ماغرتني بسمي والحچي هـواي
حالي من حال اليوزع عالخدم مـاي
خادم الخـدامكم آنه أكتـفي ابـهاي
ما أريد اويـاي واحد أنتم ويـاي
بحماكم . كاتب وقف إسمي
بحماكم . وبكل وگت يمي
بحماكم . هاذ آنه إيماني
حبيتكم
******
آخر احچايه أرد وأصرخ أحبـكم
تنگطع رجلي إذا اترك دربـكم
الخاطر الزهـراء خلوني ابقـربكم
ماأريد الجنة أريد أدخل گلبـكم
واليتكم . مملوك كل عمـري
واليتكم . وياكم أظل أجـري
واليتكم . والصوت بآذاني
حبيتكم