انه وياك واحد

قصيدة : انه وياك واحد
للشاعر : حمزة السماوي
 المناسبة : ليلة 16 محرم 1441 هـ
حسينية داود العاشور

آنه اوياك واحد .. والعباس شاهد
ها ياراس الحسين .. ها ياراس الحسين
♦️♦️♦️♦️♦️
يراس حسين .. ينور العين
نسيت ايامنه الحلوه وليالينه
عشت وياك .. حرام انساك
طيبه عشرتك ما بيهه مو زينه
ركبت النوگ .. دخلت السوگ
لجل عيناك والغالي تعز عينه
يحضن الطير .. يوجه الخير
جبير الخوه ما معقوله ناسينه
بس يالغالي اعذرك .. زين وباقي نحرك
زين وهم كلت زين .. ها ياراس الحسين
♦️♦️♦️♦️♦️
شتريد اتكول .. منو المسؤول
إنه المسؤوله لا تهتم يبعد آنه
يخي واتهون .. اصير عيون
يبعد الحيل ما كول آنه تعبانه
سهرت الليل .. عبرت الخيل
وعبرت النوگ بس عليك قلقانه
الشمس تاذيك .. ومنو يراضيك
اذا تزعل اصير اوياك زعلانه
وازعل عاليزعلك .. تاج الراس اكلك
وتكلي تأمرين .. ها ياراس الحسين
♦️♦️♦️♦️♦️
سؤالي الان .. صدك عطشان
حرام الماي من بعدك اذا ضكته
صباح اجروح .. يروح الروح
جم حسين عندي هو بس انته
دموعي اتسيل .. فرات ونيل
وحقك يا حبيبي النوم ما شفته
زمانك راح .. بقيت ارماح
عكبك يا اخو صاير ابو لاخته
اعيوني لا يهمك .. ما دام آنه يمك
تطلبني وفه ودين ها ياراس الحسين
♦️♦️♦️♦️♦️
كبرنه ازغار .. سوالف نار
وتتذكر بيوم الماتت الزهره
اكعدت وياي .. وبچينه اهواي
لانّه اثنينه اسمعنه الضلع كسره
وعلي من راح .. سمعت اصياح
تكلي يالعزيزه استقبلي الطبره
وجودك جان .. الي اطمئنان
العمر مره يغالي وخوّتك مره
راسك يعني انته .. شكد سولفنه سكته
ما مره كلت وين .. ها ياراس الحسين
♦️♦️♦️♦️♦️
الحياة ادور .. واجه عاشور
واجيت امن النهر ايدك عله ظهرك
شكلت ياراس .. مشه العباس
وبقيت لوحدك من يوكف بضهرك
بعد ساعات .. اجت لحظات
الزمت نحري عرفت آنه انكطع نحرك
تجيني اصوات .. واحس طبرات
اثنعش طبره الشمر متقصد ايطبرك
بحيدر طبره يبدي .. لحد طبره المهدي
ائمه اثنعش بالعين .. ها ياراس الحسين
♦️♦️♦️♦️♦️
يحال الحال .. شدهت البال
اشوفك عالرمح وعيوني تحجيلك
يجي القران .. يصير السان
يخويه بثغرك وبالكهف ترتيلك
بعد ايام .. اطب للشام
واخذ من جبهتك صبرك وحيلك
يزيد ايطيح .. بمهب الريح
ويضل ساطع نهارك يالبعت ليلك
وعيونك يخويه .. وآنه بت ابويه
عزّلت الدواويين .. ها ياراس الحسين