بالله يا نهر

قصيدة : بالله يا نهر ما شفت أثر
للشاعر : السيد عبد الخالق المحنه
 المناسبة : ليلة ٧ محرم ١٤٤١ هـ لندن

بالله يا نهر .. ما شفت أثر
ضيعت أخو .. يكسر الظهر
ابو فاضل .. ابو فاضل
يكسر الظهر
*****
عالشط مالت الراية شفتها
خويه حسين إدركني سمعتها
لمن ناده بأسمي أستغربتها
مولاي وإمامي تعودتها
كلمة خويه ما مرت عليه
اول مره يلفظها إليه
لازم صابته إسهام المنيه
وبهاي الأخو يحتاج اخيه
ناده بالأسم ... والأمر مهم
بله لو وگع ... بيمن أحتزم
يخو زينب ... يخو زينب ... ما إلك خبر
*****
أمشي وألتفت خلاني دهري
وأنشد يا نهر وتنلي مدري
عطشان ابو فاضل وانته تجري
وين بيا كتر مچتول ذخري
واگع ابن ابويه وضيعيته
دمع المحد يعرفه بچيته
چف يمناه عالغبره لگيته
جية والد الابنه اجيته
صوتي يعتلي ... ضيعت هلي
ركضتي اله ... ركضيتي لعلي
على راسي ... على راسي ... سطرة الدهر
*****
چفه يا نهر لمن حملته
مو چفه جبل يذبل رفعته
دم يمينه اليجري تبعته
لحظه وچف يساره مرمي شفته
مدري اشصار بيه من نظرته
قبلته وگطع قلبي بقطعته
چفك مدري ضلع امي شبگته
عباس وعلي ظهري كسرته
ها يحسرتي ... راحوا اخوتي
يا نهر بعد ... شنهي ظلتي
علي بويه ...علي بويه ... واگع الكمر
*****
هذا يا نهر آخر حچينه
ما اسئلك بعد بين ولينه
خل احچي وي حامي الضعينه
والطم صدري بيساره ويمينه
تمشي وشايل جفوف القطيعه
وقبلهن وأعاتب بالشريعه
أقسم بالنبي وسر الوديعه
ما مخلوق يحمل هالفجيعه
ذاك أبا الفضل ... عالجرف عدل
عينه عالخيم ... والدمع يهل
ها يخويه ... ها يخويه ... راسك انشطر
*****
ها عباس ها چنك صحتلي
لو عندك إچفوفك أشرتلي
من يمك طحت مدري شكلتلي
يمكن گتلي زينب باوعتلي
لا خويه إطمن محد وصلها
وحدي من أرد راح اشرحلها
شتگول بسهم عينك أكلها
لو ساكت أضل ودموعي اهلها
ها يهيبتي ... ها يرايتي
هذي وكعتك ... مدري وكعتي
وانه عيني ... وانه عيني ... فگدت النظر
*****
عباس العذب بيدك غرفته
ضامي وذكرت ضامي وشمرته
من فدوه رحتلك ما شربته
چا بردت كلبي وجمرته
بارد چان بله احچيلي عنه
كون انطي الرضيع شويه منه
كاسر خاطري ظل ينتظرنه
ما يدري وگع حارس ضعنه
وضعي مو سهل شحچي للطفل
عذّبه العطش ... وانته منتچل
يرضيعي ... يرضيعي ... عمك اعتذر
*****
أرد أنهض ومنهو يمدلي ايده
بيش يكوم الموسد عضيده
چلمة شامتي لا مو بعيده
سهلة وگعته وگطعة وريده
غمض عينك وموت على إديه
روح وانقل الجدي التحيه
وسولفله العطش شمسوي بيه
كله الملتقى قبل المسيه
انته تحتظر ... وانه انتظر
وانته مستحي ... وانته اعتذر
ابو غيره ... ابو غيره ... سيد الفخر
*****
افرح يالعدو ظليت وحدي
ايد على الظهر وايد على خدي
وينك بالمثلث هذا جبدي
زينب لليسر خويه استعدي
انه بلا أخو تبين مشيتي
وأنتي بلا ابو فاضل صفيتي
رحت الكافل وسهلة قضيتي
ساعة وترفس الخيل بلحيتي
گرب الوعد ... ساعة لو بعد
واحسب الشمر ... عالصدر كعد
انه ضامي ... انه ضامي ... يكطع النحر