قصیدة : حرامات...فاجأني طبعك يا دهر

الشاعر : السيد عبدالخالق المحنّه

الرادود : الحاج ملا باسم الكربلائی 

 

حرامات...فاجأني طبعك يا دهر
حرامات...ترضى النبي وجهه انسطر
إنقلابك يا دهر شر منقلب...رايد تساوي الرماد ويه الذهب
حرامات...حرامات
******
صحبتك صحبة لئيم...ما تحب كف الكريم...هِيَّ راده
يا دهر حلمك بعيد...رايد تسيّد العبيد...عالسياده
صاحبت ناكر جميل...بغضاً بحامي الدخيل...بالعناده
أيّدت رابع يصير...وشتريت شكم ضمير...والتماده
حسد بيك...و الظلمه تحسد بالقمر
حسد بيك...والصحراء مو قد البحر
تكره الباب و جبت أهل الحطب...رايد تساوي الرماد ويه الذهب
حرامات...حرامات
******
نصبت قاتل جنين...أول على المسلمين...يا خلافه
والسطر وجه البتول...يحكم بإسم الرسول...يا وسافه
إنت تعرف باختصار...ماكو بس سيف الفقار...بالكلافه
بايعت شبه الرجال...الما لزم سيف بقتال...باعترافه
إذاً ليش...عفت الشرف و اهل العقل
إذاً ليش...و تصاحب الما له أصل
هي لو بيدك بقت ماكو عجب...رايد تساوي الرماد ويه الذهب
حرامات...حرامات
******
ظني يندالك جبين...من شفت أم البنين...هالوفية
أربعة عندها بدور...تدري ما بيهم قصور...حيدرية
ما تناشد يمة وين...بس تنادي يا حسين...رد إليه
يوليدي أربع فحول...فدوة لترابك تقول...تدري بيه
على الراس...أم المواقف والنعم
على الراس...لازم تدنگ لها الزلم
من تساوي الأسفل بعالي الرتب...رايد تساوي الرماد ويه الذهب
حرامات...حرامات
******
إنت لو مرة صحيت...بكربلاء جان استحيت...غربة غربه
والنهر يروي الخيول...ما روى إبن البتول...والله صعبه
ظامي و أطفاله ظماة...من عسن مات الفرات...ما يشربه
والطفل شنهي الجناه...بيا سبب مات بظماه...ما تحبه
على الماي...هو تدري يا جف الوقع
على الماي...حتى الطفل نحره انقطع
سيد الماي بظماه و ما شرب...رايد تساوي الرماد ويه الذهب
حرامات...حرامات
******
من وقع فوق الرمال...عينه ضلت عالعيال...و انت شفته
من إجت زينب تصيح...ينهض و يرجع يطيح...رجع إخته
زينب تصد من بعيد...باوعت قطع الوريد...حز رقبته
إنت لو عندك حياء...تنتحر في كربلاء...بس فقدته
لَوَن بيك...ذرة شرف ذرة قيم
لَوَن بيك...جان احترقت ويه الخيم
يا دهر ما تستحق نظرة عتب...رايد تساوي الرماد ويه الذهب
حرامات...حرامات
******
يا دهر زمرة يزيد...حققت حلمك أكيد...جف جبينك
زينب بلاية كفيل...والشمر بيها يعيل...إنت وينك
السياط على المتون...و الأشد سوط العيون...عمية عينك
حرمة و الوادم لئام...هم و الرحمة خصام...إي أدينك
علي قال...إي يا دهر أُفٍّ لَكَ
علي قال...والحق قليل التدركه
ماكو عندك واجب ولا مستحب...رايد تساوي الرماد ويه الذهب
حرامات...حرامات
******
ما شفت جيش الذئاب...داسوا بصدر الكتاب...إي شفتهم
أدري كل حافر يشيل...قطعة من جسم القتيل...شجعتهم
داسوا الشيب الخضيب...وانجوى الخد التريب...يا حقدهم
خنصره دورته وين...والجفوف بلا إيدين...دورتهم
ترا هاي جثة محمد عالثره...ترا هاي زينب تدور خنصره
يا دهر تدري رسول الله انسلب...رايد تساوي الرماد ويه الذهب
حرامات...حرامات

تعليقات

لإرسال تعليق یجب أن تسجل في الموقع

ملفات فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x