القصيدة : يتامه من عفتنا يا علي
️الشاعر: علي الخفاجي
الرادود : الحاج ملا باسم الکربلائی
يتامه من عفتنه يا علي
*****
شحال زينب من عفتها
يا بو زينب للمحن
هذا جبرائيل أشوفه
فصل بأيده الچفن
صوّت الناعي عله فگدك
وسفه وأندار الزمن
باچر أعيالك يتامه
ياعلي يابالحسن
تشوفه صوت زينب يعتلي
*****
الدنيه مو دنيه بغيابك
وحشه بعدك دنيتي
للگبر وياك أخذني
بويه وأرحم حالتي
أشبچ العشره عله راسي
وعيني بعيون أخوتي
والصخر ذاب وتفسر
يا علي من ونتي
عجيبه ظلمه دارك يالولي
*****
تزاحمت ليش عله بابك
بويه أملاك السمه
شلون هـي الليله أشوفك
سابح بفيض الدمه
يا علي عندك أمانه
ودعتني فاطمه
شلون يطبر سيف راسك
وأنت حماي الحمه
دليلي بنار هجرك يبتلي
*****
صدگ باچر ما أشوفك
لو تواريت الثره
لو مشيت وأمنتني
بأيد سبع الگنطره
راح أشاهد چم مصيبه
من عگب عينك تره
عالفراگ وعالنوايب
مثلي ما تصبر مره
مصيبه والهظم ما ينجلي
*****
چنت تمسح دمع عيني
من تضمني بلهفتك
شلون هاي الليله أودعك
وأيدي تمسح دمعتك
شالوا الروح وخذوها
لو مشوا بجنازتك
حيره يا والي اليتامه
تحيرت بمصيبتك
يحيدر روحي بعدك تنولي
*****
طلب هاي الليله عدها
من أبوها أم الخدر
صحت خليني يحيدر
أنزل أوياك الگبر
عليك ضلع أمي الزچيه
يا علي لاتعتذر
باللحد باچر أشوفك
لو طلع خيط الفجر
وأموتن من تفارگ منزلك
*****
ليلة أوداعك رهيبه
والله يا عقد الوله
ريت ميته وياك بويه
ولاشفت طف كربله
طفل ست أشهور عمره
تذبحه نبلة حرمله
وعالتراب حسين نايم
ماكو أحد غسله
وأعوفه عالشريعه كافلي
play_arrow
play_arrow
play_arrow
play_arrow
play_arrow
play_arrow
تعليقات