قصيدة : ببابك ومديت اديه
️للشاعر : حمزة السماوي
المناسبة : اسشتهاد الجواد (ع)
الزمن : ليلة 3 ذو الحجة 1439 هـ
جامع الحاج علي باش - بغداد الكريعات
ابابك و مديت اديه
ماكو احن منك عليه
راحة الدارين عند الكاظمية
*****
ياللي جبريلك ضريحك
بالحوائج يوحي
تعبتي الدنيا و اركض
جيتك اويه جروحي
من ثقل همي يغالي
قوه شايل روحي
والله لو ما انته بويه
ما اسمعك نوحي
شوفتك تنقط محنه
انته غيره بروس اهلنه
راحة الدارين عند الكاظمية
*****
حسين جدك ما يقصر
ادري من امشي اله
هو وداني عليك
و قلي روح اشكيله
ادري انته وياه واحد
يا وريث العيله
قصتك اويه حسين تعبر
الف ليلة و ليلة
يالجواد افتحلي بيتك
من طرف جدك اجيتك
راحة الدارين عند الكاظمية
*****
الدنيا ما صاحبت عاقل
يركضلها الجاهل
غيرك المن احجي همي
و يا بشر يستاهل
كلمة الحب بيها حرفين
ووصف متكامل
الحاء حق حبك عليه
الباء غيرك باطل
كون ما رايدني قلبك
من طرف واحد احبك
راحة الدارين عند الكاظمية
*****
روحي يمك يا بو روحي
كل مسه مخليها
السالفه الما بيها اسمك
ما اسولف بيها
فارغه جفوفي اجيك
و من اطب تمليها
قبل لا بالحاجة اقلك
حاجتي قاضيها
جنة الزهراء صحنك
الله لا يحرمني منك
راحة الدارين عند الكاظمية
*****
بالعمر لو ماكو انته
عيشيتي اشتسوالي
بيك والله نور عيني
يا الف هنيالي
اول حجايه امن ازورك
تخطر ابنص بالي
ابفطرتي مولاي اقلك
يا حبيبي الغالي
جروح ابويه الفهمتني
و اشكر امي العلمتني
راحة الدارين عند الكاظمية
*****
سيدي و كل عام تبقه
كعدتي يم بابك
سجدة اخوة يوسف اسجد
كل سنة اعله اعتابك
يا عزيز الكاظمية
و الذهب بترابك
تزدحم كل الملايك
كل مسه ابمحرابك
يا فخر كل المفاخر
غيمتك تمطر جواهر
راحة الدارين عند الكاظمية
play_arrow
play_arrow
play_arrow
play_arrow
play_arrow
play_arrow
تعليقات