قصيدة : لو نويت
الشاعر : الادیب أحمد الذهبي
الرادود : الحاج ملا باسم الكربلائی
اصدار : محرم _١٤٤٠
طور : امرأة _ من _ نور
لو نويت تروح .. قلبي وين يروح
لو صدق لا سامح الله و فارقتني
يالوداعك آه .. أسألك بالله
زينب اني لو جبل واقف شفتني
مع السلامة لو قلت
إحسبني من باجر متت
لو نويت تروح
*****
لقائي ، و لقائك سكتة بيه كل شي حجينا
فهمنا ، بعضنا بالدمع لمن بجينا
قلت لك ، قريبة خيولهم صارت علينا
قلت لي ، وعد مكتوب يا خوية اشبدينا
صرت أشوف الليل .. جن سنابك خيل
تسحق بصدري و تفوت الساعة لحظة
يمشي ليل الموت .. اسرع من الصوت
ليلة وداع الحبايب جنها ومضة
يا موتي ليش استعجلت
احسبني من باجر متت
لو نويت تروح
*****
وقفنا ، بوداعك و الزمن ويانا واقف
و رجفنا ، و رجف حتى الكلام على الشفايف
صباحا ، قلت لي تنجفي دلال المضايف
و سألتك ، يا خوية بيا متن للسوط اشاقف
واسمع من الغير .. مو صباح الخير
شامت يقلي البقية في حياتج
و عرشي راح وياك .. و اسمع بلياك
عرشج الهزلة الاميرة مو صفاتج
و اني اميرتهم جنت
احسبني من باجر متت
لو نويت تروح
*****
بسكتنا ، يا خوية و جرحك يسولف و اسمعه
يقلي ، نهارج مو سهل حضريله دمعة
من اشوفك ، صدر و الخيل و الدنيا على ضلعه
و حقك ، انا و الخيمة نوقع فرد وقعة
و توقع سنيني .. دمعة من عيني
حزنك يلفني جرح فوقاه عباية
لا على بختك .. لا يا بعد اختك
ما يلوق وي الخدر ثوب السبايا
و بجالك انا تدللت
احسبني من باجر متت
لو نويت تروح
*****
احاول ، يا خوية و ما يصح بيدي و امنعك
ولا اني ، مقاتل حتى للميدان اتبعك
منونك ، اقدمه شلون تقبلها و اودعك
و انا ادري ، جوادك ياخذك بس ما يرجعك
من قلت رايح .. مني شي طايح
دورت قلبي و لقيتك مني واقع
والله ما ادري .. احترق صدري
ولّا دخان الخيم من صدري طالع
و حتى بكلام اتعثرت
احسبني من باجر متت
لو نويت تروح
*****
منيتي ، و منيتك باجر تشاهدها عيني
شمرهم ، يذبحك و اني يذبحني حنيني
و اشوفك ، تقوم و تعثر تحاول تجيني
وصوارم ، اسنه و نار ما بينك و بيني
انت زينب وين .. و اني وين حسين
باجر نردد سوا لحظة منية
و اختك تعاتب .. و نحرك يجاوب
انذبح شاء القدر و انت سبية
ما اعرف اني اشجاوبت
احسبني من باجر متت
لو نويت تروح
*****
اسالك ، يا خوية و خايفة بس لا اعذبك
تقلي ، بمكاني لو صرت شيسوي قلبك
اعاين ، و اعدد للشمر كلما يضربك
و اشوفه ، يجر سيفه و على وجهك يقلبك
يرفسك بظهرك .. من يحز نحرك
قل هو الله احد دمعتها تجري
تصرخ جروحي .. و الصدى بروحي
عوف اخوية و هاي انا اقطع لي نحري
ما جنه يسمع من صحت
احسبني من باجر متت
لو نويت تروح
play_arrow
play_arrow
play_arrow
play_arrow
play_arrow
play_arrow
تعليقات