قصيدة : يا بناتي

للشاعر : حمزة السماوي

الرادود : الحاج ملا باسم الکربلائی

المناسبة : ليلة 18 محرم 1440

حسينية الحاج داوود العاشور

 

يا بناتي

مدري متغيرات لو متغير انه

يا بناتي

الرمح كاعد بالمكان المو مكانه

يا بناتي .. يا بناتي

*****

يالي دللتني من خلّص دلالي

بخدي ظل بويه مكان البوسه خالي

انعم الله اعله الرمح يا بويه عالي

و يطمئن اعليجن بكل خطوة بالي

بذكرياتي

خمسه اذكر من ادري من اذكر قليلة

بذكرياتي

سكنه خوله عاتكه رقية العليلة

يا بناتي .. يا بناتي

*****

سكنه بويه ليش ما كالولج الناس

على الصار اعله الشريعه فاضت احساس

بعد لا تقرين جيب الماي عباس

مات عمج و البقاله اعله الرمح راس

امنياتي

جانت اكبر من عطاشه و سالفة ماي

امنياتي

الشمر واكفلي و اريده يوكف وياي

يا بناتي .. يا بناتي

*****

بله شأخبار العليلة التنتظرني

كسرة العباس مدمعها كسرني

ميت و قالتلي بويه ما تمرني

القهر زينب اسمع تقلي قهرني

من مماتي

هم تجي لو ما تجي خلّص حجيها

من مماتي

بالمدينة و اني دوم اسمع حجيها

يا بناتي .. يا بناتي

*****

غاليه البنت اعله بوها شقد يحبها

شلون اذا قدامه فد واحد ضريها

بنتي خولة تموت عطشانه شنذبها

تشرفت تربة بعلبك من تربها

يا غلاتي

ادري من اتردلي زينب ما تجيني

يا غلاتي

أربعيني بدونها مو اربعيني

يا بناتي .. يا بناتي

*****

عندي موعد بالحلم اوصل رقية

واعدتها من جنت بالطف رميه

تقله بويه ليش متأخر عليه

يضربوني و على حلقي مخليه اديه

يا آغاتي

الزهره وصتني اعله زينب من مشينه

يا آغاتي

البيها المكفيها ما عايز بجينه

يا بناتي .. يا بناتي

*****

جرد اسماء الضعن جمعة عيوني

مو نفس ما راحوا ايتامي يجوني

شلون اله تقولن يبويه انتو لوني

السبوكم و اني برتابي سبوني

وي خواتي

ملطخ ابدم يجي الثوب المن الثوب

وي خواتي

بويه مشتاقتلك اعله الظهر مكتوب

يا بناتي .. يا بناتي

تعليقات

لإرسال تعليق یجب أن تسجل في الموقع

ملفات فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x