قصيدة : يركض اجانه الصبح
للشاعر : السيد عبد الخالق المحنه
المناسبة : ليلة 10 محرم 1440 هـ
المكان : هيئة شباب علي الأكبر - لندن
يركض إجانه الصبح
مستعجل اعله الذبح
و اليدخل الكربله
ما يطلع ابلا جرح
*****
ليش ليش
مستعجل و تركض شلك علينه
روح روح
لو عندك مروة فلا تجينه
قول قول
تفرح اذا شفت الحبل بدينه
عاد عاد
اتأخر شويه تره انولينه
رد يا صباح الدمع
صوت الشمر ينسمع
و اليعرف المسألة
ما يطلع بلا جرح
*****
هاي هاي
سبعين الف تتهيأ الألمنه
وين وين
انطي وجهي من بعد زلمنه
نار نار
تدري بصباحك تحترق خيمنه
خاف خاف
عالمشرعه باجر يقع علمنه
ذاك السهم مو سهل
يقطع وريد الطفل
و الينظر الحرمله
ما يطلع بلا جرح
*****
صار صار
واضح غدا بت فاطمة وحيدة
ويل ويل
موته الهواشم و النجف بعيدة
ماي ماي
يعطش اخوي و ينظر العضيدة
موت موت
ياهو الأشوفه انظر الوريده
مو بس خيم تحترق
باجر نبي ينسحق
و اليقبه بالعايلة
ما يطلع بلا جرح
*****
ذاك ذاك
وجه الشمر لا تعتقد اضيعه
حيف حيف
يرفس اخويه و عالأرض يوقعه
اه اه
راس الحبيب امن القفه يقطعه
عين عين
عينه عليّه و عالرمح يرفعه
باجر يطيح المتن
قبله يطيح الجفن
و اليمشي وي قاتله
ما يطلع بلا جرح
*****
ليل ليل
من هسه دخان الخيم اشمه
خيل خيل
ها يا رقية تصعب المهمة
هنا هنا
باجر اذانج تنقطع يعمه
ويل ويل
ياهو الأضيعه و يا طفل الزمه
باجر رماد الخيم
يصبغ وجوه الحرم
و العايش المعضله
ما يطلع بلا جرح
*****
هاك هاك
ابن امي يحسب و الأصابع عشرة
شوف شوف
لكن على الخنصر يطيل النظرة
عود عود
منهو اليسلب خاتمه و يبتره
ليش ليش
يحسب ضلوعه و يمسح اعله صدرة
عشرة خيول الظهر
حتما ترض الصدر
لو شاف عقد الوله
مايطلع بلا جرح
*****
راح راح
من الرمل وسادة شفته
نام نام
و اتمدد عليها و لزم رقبته
ذاك ذاك
ذاكه مكانه و يعرف بذبحته
آه آه
اني بخيامي و اسمعت حسرته
قام و قصد للنهر
من يمشي محني الظهر
و المحني من أوله
ما يطلع بلا جرح
*****
هام هام
ها يصبح خو وضحت الحكاية
صار صار
افقد اخوتي و الشمر ورايه
جيش جيش
ينظرلي و رماد الخيم غطايه
صيح صيح
باجر بنات المرتضى سبايه
باجر ركوب الهزل
لكن بديه الحبل
و اليمشي بالقافله
ما يطلع بلا جرح
play_arrow
play_arrow
play_arrow
play_arrow
play_arrow
play_arrow
تعليقات