القصيدة : سواد الطف
الشاعر : ايهاب المالكي
من اصدار : باسم 1440
يا عباس يا عباس
اكشف سواد الطف ضوه و اجرح ظلامه
و اسرج جوادك للحرب..و احكم لجامه
وجه المنايا انطيه امر..يفتح لثامه
و بحرقه سل من الغمد..يوم القيامة
*****
يم الفرات ثبت علم
موطئ قدم... واطلق سراحه
امطر حياة و احضر مدد
يم كل جسد ..ثقلت جراحه
يا فارس اعلن موقفه
و عطّر تراب الطف وفه
هب بعدوك عاصفة..و ذوقه العواقب
لم الجموع المذنبة..و رمحك يحاسب
انت بقواميس الثأر..اخطر محارب
ارفع يمينك للسما..ولوح الكواكب
ابرز مثل وجه البدر..لحظة تمامه
*****
كل لحظة بيك يحلم طفل
يا بوالفضل..ما تنسى حاشه
ظلت عليك عين الخيم
من انهدم..حيل العطاشى
يالمعتني الماي بقصد
السجدة عطشت و الحمد
جم نظرة تنتظرك ترد...تحيي الأماني
انت بخلق وقت الوفه..جنت الثواني
قلك خلص دوري القدر ..و انت بمكاني
سيفك محامي الزلزلة..و سبع المثاني
بالطف كتاب الله امر...تحرس كلامه
*****
يبقى الحسين يشتاق لك
يتأملك...دمعه بصلاته
الله اليعين جفنه الخلى
و صوتك ملى..كل ذكرياته
كلما صلت صولة جسر
زينب على بالك تمر
رادت وعد غصن النصر..ما يبقى ذابل
ال بالحرب يتخيلك..لمن تنازل
يفهم بان الله امر..يبعث مقاتل
كل ضربة يهتفلك علي..اي يابوفاضل
انت الغيور اليحلف..الموت بحسامه
*****
بين السيوف خُط ملحمة
من الدما..بهيبة نزالك
وصّي الجفوف توقع حذر
خاف الخبر..يوصل عيالك
مر النهر و انت العذب
يثني السهم جفنك صلب
جمرة الظما و قلبك عشب..يحرق لظاها
جرد قوانين الحذر..من محتواها
كل رية تشهك خطوتك..يخلص هواها
رهبة نظرتك تذبح ال..يدخل مداها
نيزك يمينك لو نزل..يترك علامة
play_arrow
play_arrow
play_arrow
play_arrow
play_arrow
play_arrow
تعليقات