قصيدة : لو حان الرحيل
للشاعر : عمار هليل الواسطي
طور : حب_بلا_خصام
ليلة ٥ جمادى الثاني ١٤٣٩هـ | بغداد
لو حان الرحيل
انته تدري بواجبك يحيدر
يالحزنك ثقيل
هالله هالله بزينبك يحيدر
*****
احزان و الم و الحيل انهدم
اصعب ليلة عالزهرة
مكسور الضلع و سوالف دمع
و الحسرة تجر حسرة
ليل بلا ضوه مخنوق الهوه
بين الونه و العبرة
قالت يا علي ياهم ينجلي
خل عينك اعله الحره
ما ظل شي قليل
روحي راح تودعك يحيدر
يالحزنك ثقيل
هالله هالله بزينبك يحيدر
*****
يا عقد الوله هاي مدلـله
زينب ياعلي بذمتك
ياذيها اليِتِم بس يقضي الحلم
يالتعرف قلب بنتك
لو حِمْل البُعِد و بعمر الورد
لو صح بيجي ما عفتك
امر الله وصل يا خير العمل
امشي و تبدي فاجعتك
يالقلبك عليل
هذا جرحي يخاطبك يحيدر
يالحزنك ثقيل
هالله هالله بزينبك ياحيدر
*****
هذا اول جرح عدها و ينفتح
باب الدمعة و الغصة
ارحل و العمر بيها شينتظر
لا ما تخلص القصة
تتيتم ترد لمن تبتعد
عنها و ما تظل فرصة
بحسين و حسن تترجه وطن
عمر الفرقة شيخلصه
دنيه و من تميل
كل قصدها تعذبك يحيدر
يالحزنك ثقيل
هالله هالله بزينبك يحيدر
*****
زينب و الزمن عبرات وشجن
الله يساعدج يزينب
فقد المجتبه همه تواكبه
مهضومه و بعد تتعب
يا حيل و تشد لو شافت جبد
من سم الغدر يلهب
هم ام و ابو و النوب الاخو
تصبر و الوضع يصعب
مفجوع الدليل
مو قصدها تعاتبك يحيدر
يالحزنك ثقيل
هالله هالله بزينبك يحيدر
*****
تكبر و الحزن كل ليل اليجن
ما عدها جفن غافي
عذبها الوكت و المدمع يكت
جمر اللوعة مو طافي
اصعب معضله اسأل كربله
دنيه و تغدر تجافي
من شيب القهر أشكال الصور
ما قال الحزن كافي
تفرح مستحيل
من حزنها تندبك يحيدر
يالحزنك ثقيل
هالله هالله بزينبك يحيدر
*****
طف و موعده لو حان و بده
زينب همها متواصل
توصل هالوطن مكفوله بظعن
كله بغيرة الكافل
تفقد جم امل عالغبرة يظل
تاريخ الالم حافل
محزوز النحر مدري عالنهر
تنعه بصف ابو فاضل
تمشي بلا كفيل
لو سبوها مهجتك يحيدر
يالحزنك ثقيل
هالله هالله بزينبك يحيدر
*****
منك و النعم يالكلك عزم
قدها و خالقك شاهد
ليلك من يجن اسرع بالدفن
خافن زينب تناشد
هاي المسأله آنه الراحله
فوضت امري للواحد
حسرة اتأملك من اتخيلك
بعدي لوحدك قاعد
بالصبر الجميل
هاي روحي تطالبك يحيدر
يالحزنك ثقيل
هالله هالله بزينبك يحيدر
play_arrow
play_arrow
play_arrow
play_arrow
play_arrow
play_arrow
تعليقات