قصيدة : يافاقد أمك

للشاعر : ناظم الحاشي

ليلة ١١ جمادى الثاني ١٤٣٩ | كربلاء

يا فاگِد أمك لاتضن

يتلاگه جِفنَك عالجِفِن

من شمعة أمك تنطِفي

ماتنطفي اشموع الحزن

******

من غير أمك لاتظن

تِحله الحياة اوتِنسِعِد

وشلون تدخل بيت إذا

مابي تشِم ريحة ورد

أمّك برِد وكت الدفو

وأمك دفو ابوكت البرد

مادامها اگبالك تِحِس

للدنيه تَوّك منوِلِد

لو ماتت ايموت الوفه

واتموت كل العاطِفه

 تخسر الگلب العاطفي

ماتنطفي اشموع الحزن

******

مثْل أمك الجرحك أبد

محّد يداويلك جرح

واجناحك أمك في زمن

تنوِكِل يه المالك جنح

شمسك واذا غابت بعَد

ماتلمح عيونك صبح

مِلحَة حياتك والعمر

ماصخ يضل ابلا ملح

لو شيب راسك مشتعِل

بعيونها اتشوفك طِفل

كلما تِشوفك تحتفي

ماتنطفي اشموع الحزن

******

شنهي الشعور البي تُمر

لوشاهدٍت موقف صعُب

واتشوف بابك يحترگ

وأمك اگبالك تنضرب

وتشوفها اتون والضلع

مكسور والمدمع يصب

وابكل صلافه اولا خَجل

ينوخذ حگها وينغصب

ينسَب أبوهه وينشتِم

واتسبّه أشباه الزلم

والثاني بَهلَك مشتِفي

ماتنطفي شموع الحزن

******

شيصير گلّي ابحالِتَك

بالمگبره لمّن تُمر

بس انته من دون البشر

ماتلگه عد أمك گبُر

والادهه من هاي وأشَد

وشلون تتحمل صبر

من ترجع البيتك تره

وماتلگه أمك تنتظر

شتسوّي وانته بهالوضع

باب اعله أمك يندفع

واتعوفك أم گلب الوفي

ما تنطفي اشموع الحزن

******

شيصير بيك ولو شفت

باب اعله أمك ينطبگ

واتشوف أثَر نار الحطب

بطراف چفها المحترِگ

وشلون عینك ماتهل

والگلب خايف من يدگ

وتشوف كل جَرّة نِفَس

أمك اگبلك تختنگ

ياناس هذا الّي جَره

ويّه امي لَبوة حيدره

والباري بيهم يصطفي

ماتنطفي اشموع الحزن

******

بعْد أمي شفِت المايمر

بعيونكم يهل البصر

ظهري ابعمر خامس سَنه

وي كسر ظلعْ امي انكسر

كل دمعه تنزل عالوجه

مثل الجرح تترك أثر

لجل العَلَيَّه ساهِرَت

ذبّل ضوه عيوني السهر

بعدْ أمي نزلت دمعِتي

طفله اوصرت أم لِخْوتي

وابأثر فاطم اقتِفي

ماتطفي اشموع الحزن

******

للأم مكانه ومنزله

يخسر تره المايتّعض

ربك الاول بالسِمه

والثاني هيه اعله الارض

من تعترضها بأي أمر

يعني لإلاهك تعترض

خمسه الفروض الواجِبَه

وطاعتها اذن سادس فرض

كل حب هواءُ في شَبَك

بس حبها ضل دايم الك

وال هالسبب من تختفي

ماتنطفي اشموع الحزن

******

يرجف جسمها ابلا برِد

لومسِّتك نسمة هوه

يعطش گلبها امن البچي

وامْنْ الدمع خدهه ارتوه

ياضوه البيت ولو مشت

مايرجع البيتك ضوه

سبحان رب الّي جعل

طاعِتَه وطاعتها سوه

أمك اذا ماشافتك

تركض تروح الصورِتك

منك أبد ماتكتفي

ماتنطفي اشموع الحزن

تعليقات

لإرسال تعليق یجب أن تسجل في الموقع

ملفات فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x