قصيدة : ورثت منج صفة

للشاعر : عقيل فرهود الكربلائي

القصيدة والدة_وقلبج_علم

داخل القصيدة : خبر_عاجل

 ١٦ جمادى ٢ | ١٤٣٩ هـ العتبة العباسية

اورثت منج چم صفه

يا مثال العاطفه

احلى ما بالدنيا اسمي

يقترن بإسم الوفه

******

اني يا بضعة محمد

قطرة يمج في بحر

كل صفاتج العرفتها

صورة من بعض الصور

نجمة تطفه بالليالي

لحظة غياب القمر

الكون انتي بكل كيانج

سيدة كل البشر

بنورج تشع السمه

اصل اصله فاطمة

تصبح الدنيه ظلام

بلحظة لو نورج طفى

******

تستحقين الزعامه

و انتي قمة اعله القمم

من رسول الله خصالج

من علي سيد الامم

لجلج الباري رعاني

و ادخلت بيت الكرم

ارعى من بعدج يتامه

و امسح الدمعه و الم

شقد عظيمة المنزلة

بيتج اقدر ادخله

ذايبه بحب و حنان

و انهل امن المعرفه

******

لحظة و ادخلتي الغرفتج

و اعلقت جفي شمع

هنا مشيتي هنا قعدتي

و شفت محرابج يشع

فاضت عيوني بغزاره

و الدمع ما ينمنع

و انه اسمع صدى صوتج

و اذكرت كسر الضلع

ويلي يا ام الحسن

كلشي راواني الزمن

و اسمعت حيدر ينادي

من على الدنيه العفة

******

غاليه و ولدج غوالي

عمري ما غمضت لي عين

اسهر اعليه الليالي

و شلي من بعد الحسين

اربعة افديت و حياتج

ما يكفون اربعين

اني ام حسين اسمي

اني مو ام البنين

لحظة لو فكري سرح

اشعر بقلبي انذبح

ابقى اسهر انه احرسه

لحظة ما جفني غفه

******

سامحيني يالحبيبة

منج ارجو المعذره

اربعة انطيتج هواشم

احس روحي مقصره

زينب تقلي وسافه

راح سبع القنطرة

جاوبتها وينه ابني

صدق قطعوا منحره

وينه ابني يُمه وين

يا حبيبي يا حسين

يالحبيب اجرحلي قلبي

عمري جرحي ما شفه

******

قاصدة و جروحي قبلي

تقدم ويايه العذر

منزله انطاني الاله

و احمد الله و الشكر

بس سؤالي يبقى واحد

ارجو توضيح الامر

بريتي ذمتي لو بعدها

قبل ميلمني القبر

بريتي ذمتي لو بعد

لو انه اوفيت الوعد

من ينزلوني بحفرتي

ابقه اني خايفه

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x