قصيدة : حلم وتراود الي

للشاعر : علي السقاي

الرادود : الحاج ملا باسم الکربلائی

 ليلة ١٠ جمادى الثاني ١٤٣٩هـ | كربلاء

 

حلْم اْو تراوَد إلي صوت النبي يعتلي

گوم اِثأَر اِلفاطمه  سِل صارمك ياعلي

مَرخوص اِبقتالك  إِفعَل مابَدالك

******

 حِيدر أنا اليبچي سيفه

اْو يضحك عدوّه ابطريقه

باليقظه أحلَم تَمَنّي

اْو ياريته يصبح حقيقه

چنّي اعله مرقد مُحمّد

واَسمع زفيره اْو شهيقه

وايگلي إِنسه الوصيه

مَزّگنه ذيچ الوثيقه

هِد ياأُبوالحمله هِد

ابغير الدمه لاترِد

گوم اللي جِمعت حطب

إجمعها فرداً فرِد

راويها اِشتعالك إِفعَل مابَدالك

******

 آنه اللي أخذوا عهودي

أتصبّر اعله الظُلامه

لو ماوصية محمد

أگلبها يوم القيامه

جبريل اِجاه اْو ‏يكلمه‏

اْو چنت اَختنگ من كلامه

تُغصَب خلافة وصيّك

والزهره تُضرب أمامه

حقي اْو گلِت ينغصُب

أصبر واَشِد عالگلُب

بس ريته گال اِنتفُض

لا بضعتي تنضرُب

خل اَنظر فِعالك  إِفعَل مابَدالك

******

 الزهره اغسلتها ابدموعي

اْو هاجت من اللوعه ناري

اِلمسْت الكِسور ابإديّه

اْو بين عليّه انكساري

واِستُرجِعَت هالوديعه

اْو بالهَم رجعت اعله داري

بس الله يدري ابشعوري

حين الشفت ذو الفقاري

أحلَم وانا ابيقظتي

عالسيف احط قبضتي

أصرخ مُحمد مدد

واَسمع صدى ابصرختي

يالماكو مثالك  إِفعَل مابَدالك

******

 مُرعب شكل ذوالفقاري

اْو معروفه عن سيفي سيره

ماعُمره خيَّب مُحمد

لي حد حروبه الأخيره

خل تسمع اَهل السقيفه

لو سيفي يعلن نَفيره

تتزلزل اَرض المدينه

ابثار الضلوع الكسيره

ابسيف اَطلع اْو لا درِع

عن ثاري ما أنمنِع

لو يأذن المصطفى

تِتسمّه حرب الضلِع

سيفي وابنزالك  إِفعَل مابَدالك

******

 تَوَّه الرسول ابتُرابه

والأُمّه نزعت خجلها

وگامت رؤوس الخيانه

اتغيْر الشريعه ابدَجلها

لو ما العَمَل بالوصيه

هالزمره بيدي أجلها

چان اَحصد ابهالجماجم

من سامريها اْو عجلها

لو ماچنِت ملتزِم

فنهم ضلِع ينهشِم

چان اَحچي وي ضامري

إنهض يراعي العزِم

ياليرهب خيالك  إِفعَل مابَدالك

******

 بين انقلاب اْو جريمه

بضعة محمد ضحيّه

الجبْت اويه طاغوته صاروا

سُلطة ظلم عالرعيّه

اْو هالأُمّه ماتسوه سيفي

اْو لا تسوه تعب اْو أذيّه

لو أربعين اَلگه بيهم

چا حقّي يرجع إليّه

أنصاري بس أربعه

اْو كلمن شفِت مدمعه

سِكتت لِسنهم حزِن

اْو حچي الدمِع أسمعه

يالصبرك حِلالك  إِفعَل مابَدالك

******

 لو أخّر الباري ثاري

مايسكن اْو يهده حيفي

مِن صُلبي قائم يجيهم

مِتحلِّف اْو بيده سيفي

والأسّسَوا هالظُلامه

ايحسبونه چن هذا طيفي

وايگلهم المهدي آنه

اليوم العقاب اعله كيفي

يِخرجهُم اِمْن الگبُر

واعيونه تجدح جمُر

صوب النجف يلتفت

يتلقّىٰ منّي الأمُر

سَوّ اللي اعله بالك إِفعَل مابَدالك

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x