قصيدة : ياعلي امسح دموع اعتذارك
للشاعر : عبد اللطيف خالدي
الرادود : الحاج ملا باسم الكربلائی
ليلة ٢٤ جمادى الاول ١٤٣٩هـ/هيئة شباب علي الأصغر_كربلاء
يا علي امسح دموع اعتذارك والرزيه
يا علي انت غالي وحزنك يأذي الزجيه
******
ياعلي وبس العلي يدري بجروحك
بيدك تواري الزجيه مدري روحك
من تنام اعله الكبر فاطم تلوحك
وبلحدها هيه تشكيك وتنوحك
يا علي لا تظن تفصلها عن حزنك منيه
يا علي انت غالي وحزنك يأذي الزجيه
******
يا علي وللّي رفع سبعه اعله سبعه
ادري صعبه الغالي من توكف تودعه
فاطمه يا با الحسن ونك تسمعه
واشد عدها من الضلع من تجري دمعه
يا علي خفف ونينك يحماي الحميه
يا علي انت غالي وحزنك يأذي الزجيه
******
ندري نازعت النفس ساعة دفنها
صرت تتحسر على الزهره وزمنها
والله روحك حكها لو يسعر حزنها
وبخيالك صورة من حمرة متنها
يا علي وحك متنها اللاحته سياط الرديه
يا علي انت غالي وحزنك يأذي الزجيه
******
الدار من بعد الزجيه ندري مو دار
مقبره لمن تصدها وميته الانوار
الباب اه الباب خله بفكرك اثار
لسه تعكس عينك انت صوره من نار
يا علي ساكنه بروحك بقت نار السريه
يا علي انت غالي وحزنك يأذي الزجيه
******
ندري وحشه ومنزلك اشبه بلحدك
لا انيس الا الدمع يجري اعله خدك
حاشه لتظنها تتركك لحظه وحدك
فاطمه بأنفاسك بكل شهكه عندك
يا علي ام حسن مثل النفس ساكن الريه
يا علي انت غالي وحزنك يأذي الزجيه
******
ما نقيس ويه اليشر جمرة مصابك
ولا حزن يوصل عشر من الي صابك
تكفي هاي ومنها ما يخلص عذابك
اخر الاسباط ميت تحت بابك
يا علي المحسن بعينك نظرته اعله الوطيه
يا علي انت غالي وحزنك يأذي الزجيه
******
امر واحد بعد ما نكدر نحسه
تسكت الاصوات عندك تبقى خرسه
مخزن الاسرار حيث الباري قدسه
كبالك الطاغي اجه برجله يرفسه
يا علي شسوت بقلبك يبو الحمله الوصيه
يا علي انت غالي وحزنك يأذي الزجيه
******
اليطفي نار الثار غايب يجي امره
بيده ياخذلك قصاصك من الزمره
المهدي من يظهر نشوف وياه بشره
نصلب الجبتين بيده فوك شجره
يا علي كلنه ندعي عجل الطلعه البهيه
يا علي انت غالي وحزنك يأذي الزجيه
play_arrow
play_arrow
play_arrow
play_arrow
play_arrow
play_arrow
تعليقات