رايح ووصيتك

قصيدة : رايح ووصيتك آني
للشاعر: احمد الذهبي
المناسبة: شهادة الامام الحسن ع
ليلة ٦ صفر ١٤٣٩ آل البلاغي النجف

رايح و وصيتك آني
إنت بالطف بمكاني
يا ثمرة علي احفظ ما يلي
◾️◾️◾️◾️◾️
باچر من جنازتي يشيعوها
ما يهمني چم سهم يضربوها
مطمئنة لو ردت يدفنوها
بيك أريدن هيبتي يشوفوها
يبني من بعد المنية
راح أخلي لك وصية
أحفظها إلي أحفظ مايلي
◾️◾️◾️◾️◾️
لو عمامك حملت ضعينه إلهم
باتجاه الطف مشت قوافلهم
كونك أول من ركب محاملهم
وبمشاعر والدك تبادلهم
إشتري بروحك عمامك
لو طلب دمك إمامك
وتجاوب بلي أحفظ ما يلي
◾️◾️◾️◾️◾️
سفرة محتاجة صبر تعب بيها
مو مثل باقي السفر أنا ادريها
زينب شلون الگمر يواسيها
هيچي أمك يالولد تباريها
كونك تجازي رباها
وانت تعرف يا ضناها
ما عندها ولي أحفظ ما يلي
◾️◾️◾️◾️◾️
لو وصلتوا والظعن ينزلونه
والمخيم ينبني و يقسمونه
إبني كون شچم حسن يشوفونه
مو صغير ويا الزلم يحسبونه
إنت گلهم جاي أشارك
و أكسر خشوم المعارك
زودي من هلي أحفظ ما يلي
◾️◾️◾️◾️◾️
لو حچو لك بالعرس إجه يومه
گلهم آني زفتي على الحومة
چفي مو حنه , دمه على رسومه
نومة حلوة اعله الترب بألف نومة
عاشگ و من زغري خاطب
من جميلات الحرايب
بالحومة اختلي أحفظ ما يلي
◾️◾️◾️◾️◾️
من يعوز الطف گمر تضوي له
ليلة من كل العمر ترا الليلة
لو شفت عمك تعب تشد حيله
ظهره لمن ينحني تتچي له
كون أشوفك من تقاتل
مثلي ما تعرف تجامل
خصمك يبتلي أحفظ ما يلي
◾️◾️◾️◾️◾️
يبني وبيوم الوغى منو المثلك
عندك أغلى من الخصم شسع نعلك
أدري لمن تنذبح تصيح أهلك
وينك إحضر يالحسن بعد قتلك
و الجسد عمك يحمله
لخيمة المهضومة رملة
بالدم تمتلي أحفظ ما يلي