قصيدة: وين أم الشهيد
للشاعر : سيد رفعت الصافي
المناسبة شهادة الامام الحسن (ع)
ليلة ٧ صفر ١٤٣٩ آل البلاغي النجف

وين ام الشهيد الطاح
خلهه اتحضّر الدمعه
هيّ اتنوح عالعريس
وآني اعله الحسن انعه
*****
مامشكوره يادنيا
لان غصّاتج اهوايه
من شفت الحسن مسموم
گلت الطف نقص رايه
مايخنگني موت الريح
مرات الهوه احجايه
اني الزهره وعيوني
بجيهن جرّح اجفوني
اللطم عابر على امتوني
كل ماشوف شاب ايموت
اگول اهنا طفت شمعه
*****
شفت جبد ابني يتگطّع
وزينب كاعده اتصبره
وشفت تابوته كله اسهام
وحسين الجّم نحره
وشفت عباس ابو الغيره
عمت عيني لزم ضهره
خلص بأول سهم صبري
بقيت اتلوّع بگبري
وضلعي امكسر ابصدري
صحت ياحيدر بعبره
واجت تهوه السمه السبعه
*****
احس بالفاگده الشبان
والطم عالوجه بيدي
من تنعه اعله ابنهه المات
اگلهه امروّتج عيدي
مالوم البجت ياناس
ضگت اللوعه بوليدي
ببنهه الفاگده تحلم
اذا بردان بي تعلم
بهدومه تضل تشتم
غالي ويوجع الغالي
ومن بال امه شيطلعه
*****
واحد طاح يم الباب
والثاني انمرد جبده
وواحد فوگه صعدت خيل
شلعت وصله من خده
وواحد بقه بلا جفين
وادع زينب ابزنده
ماينشف دمع عيني
احبه اللي يبجيني
اشفع لليواسيني
من يوم المتت لليوم
الكل مجلس عزاء اسعه
*****
طبع اللي يريد يموت
بحضنهه الوالده اتضمه
بس اوليدي لمّن مات
اسمعه يصيح يايمه
ثار الحسن مثل الماي
محد يگدر ايطمه
شما مر الزمان ودار
يكبر من جديد الثار
باجر تنولد ثوار
صوت المهدي باجر صور
كل العالم يسمعه
*****
تمنيت الحسن موجود
يوم المعركه الحاسم
جان اكبر جبل بالروس
يم باب الخيم راسم
بس بكربله مشكور
كحل عينه القاسم
طب للمعركه بزوده
خله اوجوهم سوده
وفه الوالده اعهوده
گال العمه عد عيناك
ابشر يا ضوه البضعه
*****

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x