يسموني البرية

قصيدة : يسموني البرية غريب

للشاعر : علاء عبدالحسين الكربلائي

المناسبة : شهادة الامام الجواد _ بغداد

ليلة ٢٩ ذي القعده ١٤٣٨ العتبة الكاظمية

يسموني البريه ... غريب الكاظميه

جرح قلبي يواسي ذبيح الغاضريه

⁦▪️⁩⁦▪️⁩⁦▪️⁩⁦▪️⁩⁦▪️⁩

يزهراء تعالي

جيبي وياج عماتج سبايه

تِشَيْعَنْ تِصيحَنْ

فوق جنازتي وتِبْچَنْ ورايه

أوصيج ييمه

من عمي القمر جيبي لي رايه

تغسلين تچفنين

جسمي براية العباس هايه

انا الناسي جروحي على المذبوح نوحي

كسر ظهري الرواسي ذبيح الغاضرية

⁦▪️⁩⁦▪️⁩⁦▪️⁩⁦▪️⁩⁦▪️⁩

اذا هاه تريدين

ترد روحي ويموت بچبدي سمي

تِجيبين إِلي تراب

من مذبح احسين وقبر عمي

تشوفين ثلاثة

على سطح الدار وحده مرمي جسمي

أريدَ أواسي

البقى بحر الشمس مذبوح مرمي

يريت انهشم ضلعي شمرهم قص صبعي

وأحط يم راسه راسي ذبيح الغاضرية

⁦▪️⁩⁦▪️⁩⁦▪️⁩⁦▪️⁩⁦▪️⁩

يزهراء تِمنيت

أنا بعاشور حاضر يوم الطفوف

نِساوين ظوايا

أحَجْبْ خِيامهن وعيونج تشوف

يَ يمه على الماي

قبل عباس أقَدْمْ لعمتي چفوف

والحسين ضوى العين

أموت وما أخلي تلوحه السيوف

الحسين أفدي له منحر أصيرن آنا الأكبر

حبيبي وأغلى ناسي ذبيح الغاضريه

⁦▪️⁩⁦▪️⁩⁦▪️⁩⁦▪️⁩⁦▪️⁩

شتظنين يزهراء

بسبب سم الغدر شفتي المنية

أويلاه ألف آه

متت حِرگه بسبب محنة رقية

رقية شذنبها

وإيديها أصغر من حبال أمية

بالسياط يسكتون

بچيها وبالسبي تلوذ بسبية

جرح عماتي الدِّي يساعد الله جدي

شكثر شاهد مآسي ذبيح الغاضرية

⁦▪️⁩⁦▪️⁩⁦▪️⁩⁦▪️⁩⁦▪️⁩

تشوفين بالعيون

دمعتي مو لَجِل چبدي ومصابه

نحيبي لحبيبي

الچوى نحره الرمل والدم خضابه

والآهات براكين

على النزلت سبية بالخرابه

أميرات سبيات

صعب كلش صعب سلب المهابه

الضرب زينب ضربني ييمه السبها سبني

وأحس مثلي يقاسي ذبيح الغاضرية

⁦▪️⁩⁦▪️⁩⁦▪️⁩⁦▪️⁩⁦▪️⁩