قصيدة : مشتاقه لك يالغالي
للشاعر : حسين الحبتري
المناسبة : ليلة ١٨ محرم ١٤٣٩ العاشور
مشتاقه لك يالغالي
لكن رمحهم عالي
◾️◾️◾️◾️◾️
ما ريد أسولف عالمتن
و لا عن زراگه و دمه
الحبل واصل للعظم
و اتخيل انت اللچمه
طاحت رقيه من الخدر
عالگاع مثل النجمة
ما أدري إلمن ألتفت
شو كلها تصرخ عمه
نسوني حمل متوني
أيتامك ينشدوني
شافوا الراس گبالي
لكن رمحهم عالي
◾️◾️◾️◾️◾️
گطع لي گلبي بهالسفر
خلانه جُرَّن حسرات
بنص بناتك نومتك
مو عالرمح خويه تبات
كل شي و معزتك بالسبي
حتى الهواء بي لچمات
شنهي بغيابك ما ذبل
يا ورد عگبك ما مات
كون العباية تشوفها
كعبة و سياط تطوفها
ردت أشكي يمك حالي
لكن رمحهم عالي
◾️◾️◾️◾️◾️
مشتاگة شمك يالنفس
روحي أشدها بروحك
نحرك نزف دم و ضوا
من عنده أسمع نوحك
ردت أمسح بچفي الدماء
عالي الرمح ما لوحك
لو ما ترتل بالسماء
ما عرفك من جروحك
معقولة إنت حسيني
گمت انا اچذب عيني
ما عرفك أول تالي
لكن رمحهم عالي
◾️◾️◾️◾️◾️
تدري انت لو غاب الأخو
تبقى الأخت تدعي له
گبالي راسك عالرمح
و يغمض من أشكي له
يا خويه من كثر الدمع
بللت حتى الشيلة
للگاع مو تدري المطر
يوصلها بآخر حيله
تلاگينا نظرة و دمعة
و ركضت نار بشمعة
وجهك ضوا تراوالي
لكن رمحهم عالي
◾️◾️◾️◾️◾️
متعودة شوفك يالندى
تنزل على عيوني الصبح
لو گايل يدور الوكت
و عليچ أسلم من الرمح
يمر الهواء بوجهك طعن
وشما يمر يلچم جرح
راسك مثل غيمة مشت
عين الظعن مثل الفلح
من تجزي يگرب موتي
ما وصل يمك لك صوتي
تسمع انا حسبالي
لكن رمحهم عالي
◾️◾️◾️◾️◾️
طفلة من أطفالك شفت
تبچي و تأشر عالمتن
تگلي عمه شاهدي
تراب شكثر فوگ الجفن
إشگد أحضنه حاولت
بس الرمح ما ينحضن
گلت لها كافي من الدمع
بعيونچ محلية الحزن
تركض لراسك خايفة
ترجع لي مدري ششايفة
لحضنك تريد الخالي
لكن رمحهم عالي
◾️◾️◾️◾️◾️
كل ما أطب ديرة انشتم
يمبخر بريحة علي
بعرش الله ما تدري انكتب
هالناس أساميهم هلي
وشما كثر بيّه التعب
كل همي راسك ينجلي
كل ما يهزني الشوگ إلك
عطرك أشمه بمحملي
تجرحني تدري حچايه
شتموا بي هواية
وزعت حتى خيالي
لكن رمحهم عالي
◾️◾️◾️◾️◾️
play_arrow
play_arrow
play_arrow
play_arrow
play_arrow
play_arrow
تعليقات