قصيدة : حب بلا خصام
الشاعر : ناظم الحاشي
المناسبة : ١٩ محرم ١٤٣٩ العاشور
الرادود : الحاج ملا باسم الكربلائي
حب بلا خصام
وآني وي العادتك خصامي
بعيون الكلام
يحله وي الحبتك كلامـي
******
اترك كل عشق والدم والهوه
ما أترك ابد حبك
واسمع بالنبض باسمك من يدق
يالنبض القلب نبضك
يا واحد فلا غيرك بالبشر
مثلك ما خلق ربك
اتگطع وصل وارجع هم أرد
امشي انه بعشق دربك
بس بيك الهيام
وانت تعرف بس الك هيامي
بعيون الكلام
يحلى وي الحبتك كلامي
******
طير آنه بغصن وانت العش إلي
و يمك يبتدي بعمره
شما طار و عِله هم يرجع يرد
مايترك تره الشجره
لو حبك جمر هم بيك اشتعل
وبعيني احفظ الجمره
الليل اليمر اعلگلك شمع
أصابعي العشره
يا قبلة غرام
ولا اعوفن قبلتي وغرامي
بعيون الكلام
يحلى ويه الحبتك كلامي
******
اشتمك هوه ومن غيره اختنگ
شما ريح الوكت صافي
يا اجمل اسم بالحب لا تظن
غير اسمك على اشفافي
كافي من العشق قالولي كبرت
منك ما گلت كافي
لاجلك سافرت لو نار الدرب
والله امشي الدرب حافي
يالحبك سلام
صار بلسان القلب سلامي
بعيون الكلام
يحلى ويه الحبتك كلامي
******
اليعرفني ايعرِف اقصد يا اسم
من هذا الحچي الگلته
حاء اول حرف سين وياء بعد
نون حروفه خاتمته
يا ناس العشق مو حصراً إلي
هواي المثلي عاشگته
قبلي الشافته مثلي اتولعت
مو بس آني من شفته
لو صار القيام
هوه يحضرني بنشر قيامي
بعيون الكلام
واني ويه الحبتك كلامي
******
اصبر والصبر ماينفع ابد
ملت روحي من صبري
يجبرني الدمع والعاشر يرد
يرجع ينكسر ظهري
هذا الحب نهر يجري بضامري
ما ينشف ابد نهري
لمن يندفن بالگاع الجسد
وافني بحبه كل عمري
يحضرني الامام
راحة البرزخ عشق امامي
بعيون الكلام
يحلى وي الحبتك كلامي
******
انت اول اسم لمن ينذكر
اسمك تنزل الدمعه
والتوه الجرح يحجي ويه الگلب
وإذن الحبته تسمعه
يمك يبتدي والحب ينتهي
لغيرك كل عشق بدعه
والخادم صدق تحضر موتته
وانت جفوفك ترفعه
ما طاب المنام
غاب ليلي بمصرعك منامي
بعيون الكلام
يحلى وي الحبتك كلامي
******
گلبي من الزغر لايام الكُبر
يتنفس هوه احسينه
دمعة ناظري وحبل مودتي
ما بين النبي وبينه
واليذكر حرگ نيران الخيم
حيرة والد سكينه
وچفوف الگمر وسياط السبي
تبچي ولو حجر عينه
يحسين الخيام
ظلن لهذا الزمن خيامي
بعيون الكلام
يحلى ويه الحبتك كلامي
play_arrow
play_arrow
play_arrow
play_arrow
play_arrow
play_arrow
تعليقات