قصيدة : خجلانه اهواي...يا جاري الماي

للشاعر : السيد عبد الخالق المحنّه

الرادود : الحاج ملا باسم الكربلائی

خجلانه اهواي...يا جاري الماي
و الغالي ما وفيّته...هم أربعه شنطيته
******
و الله أخجل من أسولف عن وفاية...أدري ولدي أربعتهم مو كفاية
منهو آني منهو يذكرني بحكاية...من خدمته الله رافع مستواية
لو كل الناس...صاروا عباس
فدوه الوقار إلحيته...هم أربعه شنطيته
******
آني ولدي صح أخوته بس عبيده...كل شرفنه من نحصل بوسة إيده
و المصايب اللي راحت و الجديدة...ما تساوي قطره وحده ابدم وريده
ولدي الأكبار...خدام اصغار
و امقصره ما جازيته...هم أربعه شنطيته
******
اشما تضحي حته نحرك من تقطعه...ما يعادل شوغه وحده ابقطع إصبعه
و لا يساوي النظرة أخته من تودعه...لا تقارن بحر هايج ويه دمعه
اشما تغله الروح...لجدامه اتروح
و المستحه خاويته...هم أربعه شنطيته
******
آني أشعر هوه ابني و ما قلتها...من عرفته مات ضامي سولفتها
هيه كلمه الأبو فاضل وصلتها...هذا إمامك تاج راسك أكدتها
لجل الأسياد...فدوه الأولاد
بس يقبل اتمنيته...هم أربعه شنطيته
******
ما نجازي نظره وحده الطفله تشرد...ما نجازي و اعله صدره الشمر يقعد
ينظر إخته مره تسكت مره تنشد...قلها ردي و هي ظلت تمشي و اترد
ما نسوه انبوس...صدره المرفوس
أخجل إذا حاجيته...هم أربعه شنطيته
******
لا تسولف عن عطاءك و الخدامه...ما يساوي سهم واحد من سهامه
شنهو دمك شنهو راسك شنهو قامه...ما يعادل ونه وحده عاليتامه
صدره الينداس...يسوه اشجم راس
و الضامي ما رويته...هم أربعه شنطيته
******
كل مشيكم بأربعينه لو تقيّم...ايساوي خطوه امن الشريعه للمخيم
و المآتم هذي كلها اتساوي مأتم...اتقيمه سكنه وي رقية بالوجه دم
مأتم أيتام...يم نار اخيام
بدموعي ما داويته...هم أربعه شنطيته
******
الأمة كلها كل عملها من تعده...ما يساوي بيوم عاشر سجدة وحده
خده مصفح بيه جلالة نور جده...وسفه تالي خيل أمية اتدوس خده
يسلبنه اقلوب...ثوبه المسلوب
برموشي ما غطيته...هم أربعه شنطيته
******
لا سبحتك لا صلاتك لا صيامك...لا حضرتك لا جنابك لا مقامك
لا علومك و اجتهادك و احترامك...ما يساوي رفسه وحده بصدر إمامك
وين احنه ووين...نوصل لحسين
هذا العلي و تربيته...هم أربعه شنطيته
******
ما نجازي تضحياته اشما نطينه...مو كفاية لا لطمنه و لا بجينه
إلا نعرف شنهو إلنه و العلينه...لو صفينه راية وحده يرضه بينه
رايد تغيير...يد وحده نصير
نفهم عمق تضحيته...هم أربعه شنطيته

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x