خبر عاجل

 القصيدة : خبر عاجل
الشاعر : ناظم الحاشي

الرادود : الحاج ملا باسم الكربلائي
ليلة ٢محرم ١٤٣٩ العاشور

خبر عاجل هسه اجانه
على الكوثر ملتقانه
أنتو وآنه الرب دعانه
خبر عاجل
******
خبر عاجل هذا عندي
من ابويه بأمر جدي
الماتركني اليوم وحدي
واله حيدر
الطاع امري يطيع ربه
والصراط يصير دربه
يشرب الماي الاشربه
على الكوثر
هاي من عندي البشاره
جدي واگِف بأنتظاره
يگلّه حصّلت الإجاره
وبيك نفخر
هذا حاصل للشهاده
هيه تاريخ الولاده
يم جنانه الرب دعانه
خبر عاجل
******
نذر لأجلك صاحو أحنه
لو ما حُبّك ما انعرفنه
انتَ غيرتنه وشرفتنه
كل عمرنه
انتَ أول حُب إجانه
والبشر حَبّت ورانه
بيك نتنفس هوانه
يا گلبنه
احنه ولدك وانتَ والد
تحبنه ونحبك يَـقائد
ماكو حب من طرف واحد
هذا حُبنه
حُبنه كامل للوديعه
فدوه لحسين ورَضيعه
للأمانه الرب دعانه
خبر عاجل
******
وانتَ يا عباس تدري
حلمي تحفر خويه گبري
هذا مو امرك وامري
امر ربك
ماتمنيت النهايه
چف ايديك بغير رايه
والفرات العفت مايه
يِعّرِف صبرك
والله يا عباس حيره
زينب الچانت مُجيره
من أميره تروح أسيره
غدر دهرك
يابو فاضل تعرف إنتَ
كل گمر بعدك دفنته
بمنتهانه الرب دعانه
خبر عاجل
******
دنگ العباس راسه
خِجل من نور القِداسه
لِزم رجله ومنها باسه
وصاح أميري
خويه موت بطاعة امرك
لا تدوس الخيل صدرك
والشمر سيفه اعله نحرك
شنهي صبري
شهر سيفه وصاح اخوته
كون اموتن الف موته
لا يغيب حسين صوته
أفني عمري
گبله راحل شلي بيها
دنيا ما يطلع عليها
مرتجانه الرب دعانه
خبر عاجل
******
وانتي يا زينب يَعُمري
تحملي المشهد وأصبري
من يحز السيف نحري
وانشتمتي
ما اريدن دمعه تهمل
منچ ولا راس ينزل
لا گلب من خوف يجفل
يالصبرتي
والوِفَت عترة نبيها
مُرّي يازينب عليها
أُم البنين أذكريها
يختي يختي
عدها كافل ويه اخوته
اربعتهم لجلي موته
يا ربانه الرب دعانه
خبر عاجل
******
تگله من بعدك يا غالي
بيت ربي وبيتي خالي
بجالك امشي وراسي عالي
اعله النوايب
ما افُك حزنك يعمري
اله جسمي بحلگ گبري
بعدك المن اشكي أمري
وانت غايب
بحسين ياهو المثلك انتَ
دمعه رباني وخسرته
ياهو مثلك كلّف اخته
بهالمصايب
دمعي هامل عفيه صبره
ما ترجه السيف نحره
عنفوانه الرب دعانه
خبر عاجل
******
من أجت عينه لرقيه
گام يتخيل سبيه
بچت عين أبن الزچيه
إعله الشهيده
يذكر شلون بحياته
تجيب سجادة صلاته
من يغطيها بعباته
تبوس إيده
ما تنام إله اعله زنده
هسه گاع الطف مخده
وماتت بدمعتها بعده
يم وريده
بالمحافل راس ابوها
ميته يم نحره لِگوها
يا عزانه الرب دعانه
خبر عاجل
******
هاي للخدام بُشره
للضرب بچفوفه صدره
راسه بالعاشر يطبره
ما اعوفه
و إلّي زايرني ازوره
الخوف ما يبقى بشعوره
وأدخِل بگلبه سروره
من أشوفه
والمشى ليوم اربعيني
راد بس يوصل يجيني
اعتنيّ من يعتنيني
وجرحه اروفه
جنتي داخل هاي بُشره
للموالي الضحّه عمره
من وَفانه الرب دعانه
خبر عاجل