قصيدة : عجب يالناشدت
الشاعر : السيد عبد الخالق المحنة

الرادود : الحاج ملا باسم الكربلائي
 المناسبة : استقبال شهر محرم

طور : على_شبل_الرضا
ليلة ٢٦ ذو الحجة ١٤٣٨ الكاظمية المقدسة

عجب يالناشدت ليش الدمع يجري
أنه استقبل شهر بيه ينكسر ظهري
على جرف الشريعه ينهدم صبري
******
قبل لا يطلع اهلالك يالمحرم
شفت لون السواد اعله الوطن خيم
تهيأنه وبدينه ننصب المأتم
يشهر الدم أريد أستقبلك بالدم
جبت ماي العذب حضرته گدامي
يضامي إرتوي وإتذكر الضامي
تراني تولعت بالخدمه من صغري
******
انه استقبل شهر بيه ينذبح مصحف
وبعد جيش أبرهة لكعبة علي يزحف
شهر بيه المشاعر تنتقل للطف
بحر عالمشرعه يوقع قطيع الجف
شهر زينب إجه ياعيني دم سيلي
انا ليل اهدعش كل عمري يا ليلي
أنا بين المخيم ضيعت عمري
******
شهر يدمي الصدر واجفوفي لطامه
شهر بيه الرؤوس تغازل الهامه
شهر بيه النبي يحترقن خيامه
شهر بيه المنافق يكشف لثامه
على طاري الشهر يتأسس المجلس
مثل ونة رقيه ونة اليجلس
كأني بالخرابه ينحفر قبري
******
عجب يالناشدت ليش الدمع ساجم
انا استقبل شهر بِي تنسبي فاطم
إهي أول سبيه من بني هاشم
شهر موت الضمير وصحوت الناقم
أكو ونة ذبيح من العطش يرجف
عدا ألف وسبع مية جرح ينزف
ينادي يانهر مابردت صدري
******
انا استقبل شهر بي تكثر أوجاعي
اميل ابلا وعي وي نغمة الناعي
احس صوت الحسين يكسر أضلاعي
ألا من ناصرا متفارق أسماعي
انادي ياحسين ونحري قدمته
ولا غالي يظل والغالي بس انت
الشسع نعلك نحر ابني فده ونحري
******
الك هيأنه كل شي وننتظر تظهر
بده موسم جراحي ومدمعي الأحمر
على لحن القصايد نبضي يتغير
يشد عزمي الينادي بالمشق حيدر
ابشرك والجفن من هسه حضرته
ترى متني الالم زنجيلي هيأته
شسوي ما اجازي موقفك أدري
******
مواكبنه شرفنه وما نسيناها
قبل لا يطلع اهلالك بنيناها
شعارات الوفه بالدم كتبناها
زيارة وارث الجيتك قريناها
نعم عندك علم نستقبل بِالـوّن
انافس والخدم بالخدمه تتفنن
على قدر المشقه والأجر مغري

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x