نسيتك

القصيدة : نسيتك ثواني مجلس
الشاعر : سيد عبد الخالق المحنه

الرادود : الحاج ملا باسم الكربلائي
طور : أبلغك_سلامي
ليلة ١٨ محرم ١٤٣٩ حسينية العاشور

نسيتك ثواني خيالك اجاني
اخذني لشاطي حبك
اريد اعطش واكتبك
خيالك اجاني
******
ذكرتك من نسيت وبيّن أخيالك
اثاري انت العزيز الخالني ببالك
حاولت استقر واسأل على احوالك
لگيت النهر قطره بعين شلالك
جمالك قصيده مينحز وريده
نهر اني أعله دربك
اريد اعطش واكتبك
خيالك اجاني
******
اريد ارسم عيونك حتى احاجيها
شرط دم وتراب وعطش مابيها
على صدرك علامه وصافن عليها
اخاف اكتبها والعباس يمحيها
علامه تركتها كأن ماشفتها
اثر رفسه أعله گلبك
اريد اعطش واكتبك
خيالك اجاني
******
اجيتك والغزل بأشواگي يتعثر
لگيت الشاطي احمر والنهر احمر
اشوفك تبتسم واني ارتبك اكثر
لان صدري صحيح وصدرك مكسّر
منعني حيائي اجيك بردائي
يظل عاري اليسلبك
اريد اعطش واكتبك
خيالك اجاني
******
مِليته تراب خدي من شفت خدك
نعم كلك عطش بس ماذبل وردك
خفت مرتين يغتال النهر چبدك
جبت ماي الشريعه وخيّمت عندك
احبك لانك نبض گلبي منك
حلم شاعر واطلبك
اريد اعطش واكتبك
خيالك اجاني
******
تخطيت المسافه البينك وبيني
وصلت الباب جرحك وانطفت عيني
ضعت وتوسلت مولاي خليني
اشاهد خنصرك وانطيك چفيني
كتبت الروايه واريد النهايه
اذاً خليني گربك
اريد اعطش واكتبك
خيالك اجاني
******
اذا ماينذح ابني على صدري
صعب ترسم احساسك قافية شعري
واذا ماينكسر عالمشرعه ظهري
اسولف عالاخوه واني ماادري
متى ما خيامي يسعرن امامي
احس شنهو اليعذبك
اريد اعطش واكتبك
خيالك اجاني
******
حسبت جروحك الالف وتسعميه
كسور ضلع صدرك أكثر شويه
رسمتك عالأرض أشلاء مرميه
جمعتك والعقيلة تباوع عليّه
جريمه الحوافر تدوس المشاعر
أتيّه من أحسبك
أريد أعطش واكتبك
خيالك إجاني