ابدموع الحسرة

قصيدة : ابدموع الحسرة
للشاعر : ميرزا عادل الاشكاني
المناسبة : هدم قبور البقيع
الرادود : الحاج ملا باسم الكربلائی

اِبْدُموع الحسرة خل ندعي يشيعه
يعود الغايب ويبني بقيعه
يرد يبني المراقد
عله قبور الأماجد
******
الحدث مو اضرحه او قبه اومناير
الحدث اكبر يأصحاب الضماير
البقيع ابغربه و ايدور له ناصر
يبيّن عن حقيقة هالمخاطر
الِتعْدَه وهدّم قبور الأكابر
لوَن بيده يهَدّم الكعبة باجر
الهدّم بيده القبر معروفه ذاته
من أبليس اعتِقد وارث صفاته
لئيم وقلبه حاقد
عله قبور الأماجد
******
دعاء الليله ادعي او قلبي مجمور
لأبو صالح يربّي عجْل الظْهور
يرد برض البقيع او يبني القبور
او عقب وحشتها ترجع تبصر النور
او تردّ اِلشيعه ويّه الغايب اتزور
قريب امن القبر مو من ورَه السّور
يزور أجداده ودموعه اتّجاره
او نسِمْعه ابصوته من يقره الزيارة
يهل دمع الفواجد
عله قبور الأماجد
******
الموالي عايش او بعيونه طيفه
يشوف المنتظر و بجفّه سيفه
يصيح ابصوته وين أهل السقيفه
يطب ارض المدينه ايريد حيفه
يشيّد بيده للقْبّه الشريفه
يعُود او للحسن يبني مُضيفه
يغايب والمضيف انته التديره
او تصير ابصدره يا شيخ العشيرة
او يجيك الشيعي وافد
عله قبور الأماجد
******
الى كلمن سمع فتوة يزيده
رساله وإفتهم بيت القصيده
تهدْم اقبورهم لا مو جديده
لجن ما تقدر تهدْم العقيده
القبُور اتَاني هالطلعه الرشيده
أبو صالح يجي او يبنيها بيده
حلم عدنه ابظهورك وانتمنّه
المراقد من تجي تحوّلها جنّه
تعمّرها المشاهد
عله قبور الأماجد
******
ابظهور المهدي فرحتنه رهينه
حلمنه انحقّقه لمّن يجينه
مثل يوم الحُسين او اربعينه
نسوّي للحسن برض المدينه
يجيه الشيعي او الرايه ابيمينه
او اسم محبوبه مكتوب ابجبينه
نذر الله اذا حقّق مُرادي
هله بزوّار ابو محمَد أنادي
وأضل كل عمري ساجد
عله قبور الأماجد
******
اذا عنّي انحجب غوث المسلْمين
يجي يوم او اشوفه لو بعد حين
او غير اقبور عترة آل ياسين
حلم عندي انتظرته صار اِلي سنين
يشيعه ابهالمسيّه قولو آمين
نشوف أربع مناير لأم البنين
مثل ما ضحّت ابأربع بنيها
مناير أربعه انحاوطها بيها
يصير المهدي شاهد
عله قبور الأماجد
******
نعم حال البقيع ايهْيج اِلمْصاب
سلاسل عالقبر واحجاره و اتراب
لجن مرقدهم اعله الشيعه ما غاب
مثل ما غاب مرقد ام الاطياب
دفنها ابليل أظلم داحي الباب
عن موضع قبرها اندوّر اجواب
ولا أحد عرف سرها او خبرها
ابظهور المنتظر يظهر قبرها
دمع عيني يناشد
عله قبور الأماجد