قصيدة : والدة وقلبج عِلم
الشاعر : عمار هليل الواسطي

الرادود : الملا باسم الكربلائي 

المناسبة : شهادة السيدة خديجه ع


والده وقلبج علم تبقى بنتج للألم
الله لاينطي الظلم فاطمة يافاطمة
******
ياللي قلبج حاضن الدين ونبيه
ياخديجه الطاهرة الحره الرضيه
من بدة تظهر علامات المنيه
قلتي يا أسماء عينج عالزجيه
عيونج اتصب الدمع
جنها تتخيل ضلع
صحتي والحيل انهدم فاطمه يافاطمه
******
شفتي دمعة فاطمه وحزن المشاعر
بيدج اتنشفين دمعات النواظر
جنج تعرفين هاي العين باجر
تنسطر من جف لئيم وطبعه غادر
خاطرج من ينكسر
چنه خدج ينسطر
هذا واقع مو وهم فاطمة يافاطمة
******
عشتي احساس اليتم قلبج تعذب
نار حزنج ماطفت كل لحظه تنشب
وي كلمة نار شو فكرج تعجب
شفتي يم باب الزجيه نار تلهب
هالليالي المظلمة
كلها تنطر فاطمة
والدهر لا مارحم فاطمه يا فاطمه
******
اي وحق الكوثر ونبعه وزلاله
ينكسر قلبج على بنت الرساله
بطيحة المحسن شكو شعندج دلاله
من كرامة خالقج جل جلاله
بالبدر وجهه أنوصف
نوره ما تم ونخسف
موقف بدمي انرسم فاطمة يافاطمة
******
ليلة اوداعج ثقيله ويه الحبايب
يساعد الله المصطفى وأهله الأطايب
وحشه باجر والضوه بهالبيت غايب
تنسمع ونة يتيمه بقلب ذايب
ينتظرها أول يتم
تعيش ويموت الحلم
والحياة تصبح عدم فاطمة يافاطمة
******
هالزمن ينعاد بالهم والمواجع
كل حزن باجر عله الزهراء راجع
هم تودع زينب بجمر المدامع
والحزن نفسه الفرق بس المواقع
فاطمه تنوح وتون
خذت زينب بالحضن
اتخيلت نار الخيم فاطمة يافاطمة
******
يا سلام الله عليج بكل الأيام
منهو ينكر فضلج بتكوين الاسلام
شقد صعب عام الحزن صار بألف عام
تسهر عيون النبي وجفنج غفه ونام
والوصيه بدمعتج
للحبيبه الودعتج
مو مهم آني الأهم فاطمة يافاطمة

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x