قصيدة : سرك ياقبر ضمه
الشاعر : إيهاب المالكي
الرادود : الحاج ملا باسم الكربلائی
المناسبة : ليلة ٢٦ جمادى الأولى
مؤسسة انصار الحسين ع/طهران
سرك ، ياگبر ضمه لا تگول اسمه
وتبين علامه
امرك ، خل يظل خافي والجرح غافي
ليوم القيامه
بذمتك سر السمه
تبقى يمك فاطمه
******
يا گبر ضم النهار بظلمة غروبه
حتى لا ظالم يجيلك يطلب التوبه
آنه اوصيك بوصيه بحرگه مكتوبه
ما اريد الجاني يمك يغسل ذنوبه
امحي ، خطوة أجدامي وادفن ايامي
يحزن المصيبه
جرحي احفظ اوصافه والزمن عافه
لذكره الحبيبه
وحشة الماي الظمه
تبقى يمك فاطمه
******
العرش ويه الرساله للنبي انطاهه
إنا اعطيناك كوثر گله يا طه
ياگبر بس گلي شنسه وآنه ذكراهه
باللحد خليت روحي تنزل وياهه
هيه للحزن حرگه ساعت الفرگه
ثگيله الثواني
هيه نسمتي وريتي ديرتي وبيتي
وملامح اماني
موتي بالدمعه احتمه
تبقه يمك فاطمه
******
مو يقولون المحارب مو ترف طبعه
فاطمه من عين گلبي نزلت دمعه
يا گبر ماجربتها خلّگ تودعه
شلون والاصعب تشوفه منكسر ضلعه
يَمه مثل الينازع دمع اليوادع
عزيز بحياته
يمه تسكت ظنونه يحجي بعيونه
صور ذكرياته
بالتراب تذممه
تبقه يمك فاطمه
******
هيه هايه مشكلتها عشرة الغالي
صعبه عنه بالنهايه تفترق تالي
فاطمه بكل دمعه تجري تخطر ابالي
شلون ارد والبيت منها عفته ظل خالي
گلها وحشه بعيوني جمرة جفوني
توصف صفاها
گلها يختفي بظلي وأسمع تصلي
واهيم بدعاها
حقه يعگوب انعمه
تبقى يمك فاطمه
******
يا گبر خل استشيرك وآخذ بشورك
لو غبت ياهوه غيري يشعل بخورك
انه بس اندل طريقك واوصل لنورك
يعني اذا مازورك انه محد يزورك
كلفه تنتظر غايب ما الك صاحب
يآنس وحشتك
كلفه تنتظر حاير مايمر زاير
يخفف غربتك
والحقيقه ملثمه
تبقه يمك فاطمه
******
عيني تحتار بدمعها واغرگ بهمي
لو طفل يسأل عليها گلي وين امي
شرد أصبّر عاليتامه لو بچوا يمي
فاطمه احساس بحياتي تمشي وي دمي
يسأل كل طفل بيهم عنها وألهيهم
واهون خبرها
يزعل دمعته تهيم لو گلت يمكن
يطول سفرها
وآنه ما گلهم لِمه
تبقى يمك فاطمه
******
الحرگ بيت النبوه والدفع بابه
باچر بنفسه محمد يحضر حسابه
لابد بهاللحظه هاي يشرح اسبابه
من يجي ويلگه بيساره شايل كتابه
يحضر باجر الخاين عالفعل نادم
يناطر عذابه
يعثر صوته بشفافه ترجف اطرافه
يدور اجابه
والوقت هالخاتمه
تبقه يمك فاطمه
play_arrow
play_arrow
play_arrow
play_arrow
play_arrow
play_arrow
تعليقات