ربي لا تحرمني خدمة فاطمة

الشاعر : مازن الزبيدي

ربي لا تحرمني خدمة فاطمة

******

خادم الزهره اعلى بابك يا كريم ادخيلك
طامع بعطفك إلهي من ذنوبي اشكيلك
يلي تعرف بالسرائر ماكو داعي احچيلك
وآنا راكع وآنا ساجد دمعتي تناديلك
كل وكت دعواتي يا رب السمه
" ربي لا تحرمني خدمة فاطمة "
******

مو لجل دنيا اخدمتهه وانته ربي العالم
عايف الدنيا بكبرهه ، همّي اصيرن خادم
خادم الزهره مناي أتگول عني الوادم
وبالحشر تلگه بكتابي (هذا خادم فاطم)
ليل وانهار احلم بهالخاتمة
" ربي لا تحرمني خدمة فاطمة "
******

شلون ما اتمنى اخدمچ وانتي معنى اسنيني؟!
لجلچ الباري خلقني وفضلتچ تكويني
بالشدد دربي اعلى بابچ وانتي علمتيني
ما تضل صعبة بحياتي لو صحت (غيثيني)
انتي چفچ يا ام حسن ما اكرمه !!
" ربي لا تحرمني خدمة فاطمة "
******

يا إله الكون خايف گصّرت ويّاهه !
فاطمة الربّتني خادم كون أجازي ارباهه
اسنين من أبچي اعلى ابنهه وياي تبچي الگاهه
عندي عِشره ويه الزچيه وعِشرتي شمحلاهه
آنا خادمهه البديهه اتحزّمه
" ربي لا تحرمني خدمة فاطمة "
******

احزام أشدّن للمآتم من تجي الياليهه
فاطمة الزهرة عذابي بيا حزن أوفيهه؟
آه من تحچي المنابر فاطمة معذّبيهه !!
بلا شعور الطم عيوني ويلي ويلي اعليهه
كون وجه الدنيا بچفوفي الطمه
" ربي لا تحرمني خدمة فاطمة "
******

ربي يل تعرف گدرهه وتدري بيهه شصاير
ما أظن يكفي عليهه لو دميت الناظر
ولمن اذكر حال حيدر يم نعشهه وحاير
وحده تالي اليل بيهه اعلى المگابر ساير
ريت يا بوحسين لعيوني العمه
" ربي لا تحرمني خدمة فاطمة "
******

آه يا جمرة هظمهه البالگلب لهـّـابه
لا گبر يطفيلي ناري من اوگف اعلى اعتابه
للحبيب المهدي اناطر يرجع من اغيابه
يمشي ويانه لگبرهه وايده بيد احبابه
يم گبرهه اهناك ننصب مأتمه
" ربي لا تحرمني خدمة فاطمة "