قصيدة : يعباس...ما متت ماتت الشريعة

للشاعر : السيد عبد الخالق المحنّه

الرادود : الحاج ملا باسم الكربلائی

يعباس...ما متت ماتت الشريعة
يعباس...فدوتك أختك الوديعة
ليش استحيت و تعتذر...آني أظل أم الخدر
لتفكر بسوط الشمر...لبوة علي ما تنكسر
يعباس...يعباس
******
ابلايه ما يدري الحرس جيتك تراني...و الله يسترني إذا ينذل مكاني
يا حنين اشمعنه ما يهزك حناني...خوية بس لا تعتقد مو زينب آني
ما أقلك بعدك اشسوه زماني...بس أقلك ردت أظل يمك ثواني
ما ريد تنحرج...لا ريد تنزعج
ما أطيل و أختصر...يعباس...يعباس
******
انسه كلشي و خل نسولف آنا و انته...أدري صعبة المنذبح يحجي اويه اخته
بس يخوية بنومتك موقف ذكرته...مرة نهر العلقمي ابمهدك رسمته
شفتك اتأذيت و اقماطك قطعته...قلت لك اهدأ خوية و بسرعة مسحته
زعلان من رسم...و اليوم تبتسم
أيام تنذكر......يعباس...يعباس
******
من قمت تمشي صرت تمشي وراية...يعني عالفطرة تقول آنا الحماية
نقعد انسولف حكاية اتجر حكاية...ترسم من أرسم نهر يمه ضمايه
آني أرسم خيمة محروقة و سباية...انت ترسم فارس و شايل له راية
ذكراك مؤنسة...ههيات تنسه
بالروح تستعر...يعباس...يعباس
******
آنا أحس عندك سؤال تقوله حسرة...افتهمتك بس خفت قلبك أكسره
من رحت لحسين أشر لي اعله ظهره...سهم المثلث سحبته سوه حفرة
و آني نمت اعله الجرح و أصرخ يزهرة...الهالسبب صارت عباتي كلها حمرة
ارتاح و اطمئن...أرجاك لا تون
بلواي تستمر...يعباس...يعباس
******
لا تناشدني اعله لوني ما كو لوني...ينخطف كل سا شكل من سلّبوني
الله لا راواك من هجموا و إجوني...چني مو زينب شبه ميتة لقوني
بخبر موتك عالنهر من خبّروني...مدري اشصار و ابيضت جفوني
و اللون منخطف...و الحال مختلف
مشغول هالفكر...يعباس...يعباس
******
آني مقتنعة متت و إقبالك أنعه...بس عله افراقك يخي قلبي اشيقنعه
يبقه عندي بس طلب ردتك تسمعه...خوية تسمحلي سهم عينك أطلعه
من عسّنه بمهجتي و قلبي يقطعه...خوفي عينك تنشلع لو ردت أشلعه
خليه ابهالوضع...ما ريد ينشلع
بالعين مستقر...يعباس...يعباس
******
يالعزيز ابداعتي بس لا أألمك...خل أحب جفك و أشم صدرك و أضمك
آنا أدري ابهاي جلماتي تهضمك...بس أريد أتأذه بلكت أتوفّه يمك
خلي أصبغ معصبي من مجره دمك...حته من أرجع أقدمه صوغه لمّك
و هناك نجتمع...و يسيل يا دمع
بدماك تفتخر...يعباس...يعباس
******
عندي ظلت مشكلة لتقلي سهلة...راسي من أمشي أرفعه لو أنزله
راسي من ينزل يحسبوها مذلة...لو رفعته اعله الرمح راسك تعله
من يراويني الشمر راسك شقله...خاف أطيح و طيحتي عالعله عله
معلوم مو سهل...أرجاك تحتمل
ظليت أحتضر...يعباس...يعباس
******
بعد عندي مشكلة يا بو الحمية...اشلون نومتنه تصير ابهالمسيه
ابلا غطه و الوادم اتباوع عليه...خل أسمعّك شنو حل الهالقضية
من جلوس ننام بس نقعد سوية...حته الوحده الوحده لو مالت تجية
ما نام يا قمر...و أعتاد عالسهر
و النوح مستمر...يعباس...يعباس
******
من رخصتك راح أرد قلبي جبرني...و أدري خصمك سوطه بيده و ينتظرني
لا يشغلك حالي حته لو سطرني...ما ألومنه سبية يعتبرني
آنا أختك ضرب المتون اشيضرني...حته لو يغمه عليه لتحضرني
مشكور لا تجي...للموت أرتجي
لتخاف عالستر...يعباس...يعباس
******
ها يعباس اشبعد و شباقي عندي...خوية ما متعودة أركب ناقة وحدي
منهو يثني لي الركب و يقول اصعدي...بالله منهو البيه أأمن و انطي يدي
باجر بكيف الشمر قومي اقعدي...هوه يتمنه يره الدمعة اعله خدي
قانون بالسبي...مرفوض مطلبي
مقبول أنسطر...يعباس...يعباس

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x