قصيدة : تجرحني نسمة هوه

للشاعر :ناظم الحاشي

الرادود : الحاج ملا باسم الكربلائی

تجرحني نسمة هوه...بدموعي خدي ارتوه
من عيني نزلت سوه...روح ودمع و احساس
يا هواك يا هواك...يا هواك بالأنفاس
******
ودعني أغله البشر...لآخر محطة سفر...و آني بقلب مجروح
غابت خديجة و غبت...عن روحي و اتعذبت...و مفارقة أعظم روح
ويايه عاشت عُمُر...بين الحزن و الصبر...بين الدمع و النوح
هيهات ترجع بعد...و اليوم أشوف الجسد...فوق الأرض مطروح
وياها غاب الوفه...غابت تره العاطفه
عدها المكارم صفه...مضرب مثل للناس
يا هواك يا هواك...يا هواك بالأنفاس
******
منهو اليعوف الورد...و اتريد مني أبتعد...أنسه العمر و أنساك
و امنين أجيبن بعد...مثلك حبيب و سند...و انت القلب يهواك
يالغالي يوم الغبت...لو بيدي أموتن متت...حته أندفن وياك
صار الورد يندفن...و الدنية غابت حزن...صارت بعد عيناك
موسم خريف ابتده...صار الورد موعده
فوق الثره انوسده...خد القبل ينباس
يا هواك يا هواك...يا هواك بالأنفاس
******
لو ما أشوفك عدل...و اهلال وجهك يهل...لتظن يجيني العيد
يالبيك أرد للزغر...كلما يطول العمر...بعدك عمر ماريد
يالودعتني بألم...أتمنه موتك وهم...بس الوهم شيفيد
أيامي بعدك عدد...و بروحي جرحك شهد...ما يشفه و انت ابعيد
انت العمر بأكمله...من آخره الأوله
بالروح إلك منزله...مثل النفس تنقاس
يا هواك يا هواك...يا هواك بالأنفاس
******
يالودعتني و رحت...غيرك حلم ما شفت...للموت أعد أيام
مات بحياتي الأمل...و ميتم امن الأهل...لو عدوا الأيتام
طبع اليوادع محب...ميت بعد ينحسب...و يعاشر الآلآم
للماي ما ينتظر...صايم يقّضي العمر...لو فطرت الصيام
و اليفقد الجوهره...يتحمل اشما جره
و أحبابه تتعذره...يجرع مرار الكاس
يا هواك يا هواك...يا هواك بالأنفاس
******
عام الحزن من يمر...تجري المدامع جمر...و أتذكر الأحباب
و أذكر خديجة و يصب...دمعي و جرح بالقلب...ينزف و أبد ما طاب
و اليوم أهلن دمع...و العشر أصابع شمع...شاعلها للغياب
من جرح عام الحزن...ما مر منام ابجفن...و انكشفت الأسباب
أول سبب ضد علي...عن لا يصير الولي
و أخطر سبب يعتلي...اسمه و يظل نبراس
يا هواك يا هواك...يا هواك بالأنفاس
******
أنظر جرح أمتي...ينزف تحت رايتي...ليش المذابح هاي
ليش الورد ينقطع...عن النهر ينمنع...و يموت يم الماي
ليش البقيع انهدم...حته الحجر ما سلم...خل نشترك بالراي
ما رادوا المنتظر...يبدي العدل لو ظهر...يدرونه ضدهم جاي
غصبن عله العادته...يكحل نظر شيعته
لا ما تظل غيبته...و يحارب الأرجاس
يا هواك يا هواك...يا هواك بالأنفاس
******
هذا الزمن قد شهد...مثل السقيفة و أشد...ضد شيعة الكرار
موت و قتال و فتن...و انشوف عاد الزمن...بالخانوا المختار
رجعوا دعاة الكفر...و أهل الغدر و المكر...و انكشفت الأسرار
و الشيعة عانت قهر...تتأمل المنتظر...للشيعة ياخذ ثار
للمهدي متخالفه...و اموقعه عهد الوفه
تحمل عقيدة و صفه...كل شيعي رفعة راس
يا هواك يا هواك...يا هواك بالأنفاس
******
كل شيعي عاش بألم...قلبي اويه قلبه انهدم...لجله و تهل العين
و الشيعي من ينذبح...من جنحي يكسر جنح...أصبح بلا جنحين
من عندي هذا العهد...يوم القيامة الوعد...للشيعة أوافي الدين
متمره نار الحشر...من ربي هذا الأمر...ما دامه وافه حسين
هذا اليحب النبي...يصبح عدو الناصبي
ناداني صوت الأبي...الدينك نظل حراس
يا هواك يا هواك...يا هواك بالأنفاس

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x