الله يصبرك

للشاعر : علي السقاي

ياعلي بفقد الوديعة
الله يصبرك الله يصبرك
******
موحشة الليلة المدينة
و أمسه هالعالم كئيب
ماتت الزهرة يحيدر
و انت صرت ابلا حبيب
بدارك و تنصب عزاها
و من يعينك عالنحيب
التدعي أمة محمد
عافتك وحدك غريب
أحسن الباري عزاءك
و ايعظم أجرك الله يصبرك
******
يا نفس طه و عضيده
اشغير اعليك الوضع
جفك اللي قلع خيبر
صار بس يمسح دمع
بيدك ادفنت الزجية
و الها قلبك منفجع
اتصيح أرجعت الوديعة
لجن مكسورة ضلع
و النبي تسمع جوابه
ايقلك أعذرك الله يصبرك
******
ياعلي اشسوه غديرك
بيك يا نعم الأمير
صرت بس تدفن حبايب
بيدك و دمعك غدير
بيك كسروا جلمة الله
جلمة الهادي النذير
ما كفاهم الا تدفن
فاطمه بضلع الكسير
و انت مكسور بحزنها
و بهذا كسرك الله يصبرك
******
الدنيه من رادت تغرك
أيست مستسلمه
طلقتها بالثلاثة
و ارجعت لك ناقمه
خذت من عندك ثلاثه
أجرت ادموعك دمه
خذت من عندك محمد
و الجنين و فاطمه
وش ثقل هم الحملته
وشلته اعله ظهرك الله يصبرك
******
وين سيفك عن يمينك
سيفك الليلة حزين
يا أمير و مؤمنينك
قلة هاي المؤمنين
و الله لو أنصار عندك
حته لو بس أربعين
جان ما هذا الجرالك
و انت لحزانك رهين
تصبر اعله الأمة هذي
و شكبره قهرك الله يصبرك
******
امقيد بأمر الوصية
و يا حبل يقدر عليك
ترعب الدنيه ابخزرتك
يا علي و شمرة ايديك
تغلب الكثرة الشجاعة
هالمثل ما يحتويك
وحدك و تغلب عددها
و النواصب تدري بيك
انت زفراتك جهنم
و حابسها صدرك الله يصبرك
******
كلها تعرف ذو الفقارك
ما يثني اعله الرقاب
اشجرأ اعليك السقيفة
ضدك اتسوي انقلاب
لون ما عدها دراية
اجناحك انشد بعذاب
ما على صقر الحرايب
يرتفع صوت الغراب
جارت أيامك يحيدر
وشسوه دهرك الله يصبرك