قصيدة : لو رايد تشيل ابجفك الراية
الشاعر : الادیب حسين الخالدي
الرادود : الحاج ملا باسم الکربلائی
لو رايد تشيل ابجفك الراية...من أم البنين اتعلم الغاية
غايات أم الوفه...رايات أم الوفه
******
مواقفها مناقب تنذكر للناس...بواجيها سوالف قمة الإحساس
تجيب احروف زينب غذت العباس...من مهده و تعلمه و قرته اقرايه
******
هاي أم البنين التنذر الأولاد...ما صاحت ولدها اتصيح أبو السجاد
تظل باب الحوائج لليريد امراد...منبع للوفاء و للبشر آيه
******
إجه الناعي يقلها ادموعج بعينج...ها يم البنين عالصبر وينج
حرقوها الخيام و ذبحوا احسينج...و زينب بعد أخوها تنسبي اسبايه
******
مثل اخيام زينب تحترق مرات...عدها أطباع لبوه ما تذل هيهات
توأمها الشموخ و داست الصعبات...خذت طبع الزجية و تبقه وفّايه
******
ضحت بربعة و ما سألت اعليهم...بدوية أصيلة و عزم تنطيهم
تنادي حسين يمَّه و ما تناديهم...ترباتك علي و يا نعم الربايه
******
نحر حسين قصة و هي ترويها...عله إلسان الدهر كل يوم يحجيها
إذا شافت رمح حتماً يأذيها...و إذا سمعت خيم تجريها الحجايه
******
تقول أم البنين الكل شخص لطام...أنا بباب المواكب قاعدة من العام
يجي عاشور و آني بأول الخدام...عله صوت اللطم أتعنه مشّايه
play_arrow
play_arrow
play_arrow
play_arrow
play_arrow
play_arrow
تعليقات