ودعت الحسين

ودعت الحسين

العمره ماشايل اجروح
لا يلوم الذي اينوح
انه ودعت الحسين
وعفته بس عفته مذبوح
 
انه إخت البالذبح قلبه عليه
قلبه قبل اخيامي نيرانه سريه
انه إخت القايل ابهاي الرزيه
الموته سهله والصعب زينب سبيه
ياهي مثلي من الناس
قلب اخوها ابهالا حساس
حتى وابقطعة الراس
اخته عن باله متروح
 
الخنسه لو ناحت صخرها يعذروها
انه بس اليمنعوها اتنوح اخوها
الشمر من يسمع بجي ايقول اضربوها
حرمه وامتوني ابضربهم ورموها
الزجر ماقصر اوياي
ابسوطه وايسكت ابجاي
وتترس العبره عيناي
والدمع سكته مسفوح
 
المثل اخويه اشويه لو أدمي المحاجر
حتى راسه او هوه ميت بي شاعر
خل اسولف من بعد قطع المناحر
اشلون راسه ايفكر ابحالي اويساهر
ابكربله شفته مقطوع
لا جن الحالي مفجوع
ينظر او يذرف ادموع
وقتله ياخويه مسموح
 
جسم اخويه ابكربله خليته عاري
وراسه ماجنت ادري وينه
او الله داري
ومن دخلت الكوفه لنه ابإنتظاري
عالرمح شفته او عليه اسود نهاري
شفته والمحمل ايميل
واضربت راسي بالويل
دمي ظل يجري وايسيل
وحقي لو فاضت الروح
 
أمضي للشام او مضه الراس اعله رمحه
أنظره ابدمعي واحس كل نظره ذبحه
دمه يقطر والهوا يسفي اعله جرحه
وانه كل خوفي رقيه لا تلمحه
جنت اسليها وتنام
وخوفي من نوصل الشام
اتشوف ابوها بالا حلام
وبالطشت منحره ايلوح
 
الراسه أذكر موقف ايظل ابفؤادي
ركز رمحه او عجزت اتشيله الأيادي
عالسبب قاموا يسئلون الأعادي
وعلي جاوب طفله تاهت بالبوادي
وقلهم ابصوت الونيين
شوفوا نظرات الحسين
تشبح وتتجه وين
ناظره لبنته مشبوح