كل ما اشوفك بالطيف

قصيدة : كلما  أشوفك  بالطيف

للشاعر : السيد عبدالخالق المحنّه

الرادود : الحاج ملا باسم الكربلائی

كلما  أشوفك  بالطيف...لازم  تهب  نسمة  صيف...من  نومتي  اتصّحيني
ما  أدري  يالغالي  اشصار...لا  هُدهد  ايجيب  أخبار...و  آنا الهجر ماذيني
******
يالنايم  ابعيني  حزن...بالصدفه يغمض لي جفن...و أصرخ مثل قلبي الجرحته
ناحن  حمامات  السفر...و  بناظري  جمره  و مطر...ليله بألف ليل السهرته
ارجع  و لو ساعه ردت...خاطر أقلك من رحت...جم خاطر بخاطر كسرته
يا  بو  الوفه  يالمبتعد...تترك  عليله  و  ما  ترد...لا  قلبك  ايحن  اعله بنته
بالله   اشيصبرني   اعليك...لا   أندل   و  أوصل  ليك...و  بغربتي  امخليني
ظليت   أدور   تذكار...لا   هدهد   ايجيب  أخبار...و  آنا  الهجر  ماذيني
******
ظل  يدوي  بضلوعي  اللهب...تتناثر ادموعي عتب...و الورقه عالون عوّدتها
أتعذب  ابجرحي  ملح...كل ساعه أعدل و انذبح...جم ذبحه بغيابك شفتها
مشتاق أبوسك بالنحر...بوسة طفل قلبه انكسر...موته و على صدرك ردتها
أمشي  و  أدقق  بالنظر...لجدامك  اتبين  أثر...طحت اعله وجهي و قبّلتها
من  ينترس  وجهي  اتراب...أزحف  و  أنام  اعله الباب...حر الهوه ايغطيني
أطفي  الجمر  و  أشعل  نار...لا  هدهد  ايجيب أخبار...و آنا الهجر ماذيني
******
أفتر  و  أدور  كل  كتر...لازم  إله  ذكره  و  عطر...أذكر  قبل  منا  يجينه
اهنا  أذكره  من  سجد...منا  مشه  و  اهنا  قعد...اهنا  قلي يبنيتي الحنينه
اهنا  شبقني  ابلهفته...للحين  أحس  بقبلته...و  اتشابقن  عيني  اويه  عينه
اهنا  نشد  عن  صحتي...يفرح  أبويه  ابضحكتي...كاوني  و الزينب مشينه
راح  و  أخذ  كل  شي  وياه...ظلت  مدامع  فرقاه...تجرحني  و  اتواسيني
تاليها   ما   رد   للدار...لا   هدهد  ايجيب  أخبار...و  آنا  الهجر  ماذيني
******
تحت  التراب  أنظر  هدم...بيه  ريحت  الخوه أشم...هذا العلي الأكبر عرفته
الزمته  من طرف و طرف...جنه علي إقبالي وقف...ناديته يا خويه و شبكته
مرات أمسكه امن الردن...و أمشي مع الأكبر أظن...عفيه أخويه اليلزم اخته
يثقل  قميصك  يا  علي...اتراب  و  مدامع يمتلي...طين امتله بسما غسلته
خوفي   على   عطره   ايفوح...من   شمّته  اترد  الروح...من  المرض  يشفيني
حكم  الدهر  و  الأقدار...لا  هدهد  ايجيب  أخبار...و  آنا الهجر ماذيني
******
أنظر  مهد  ما  بيه  ضوه...خالي  و  يهز بيه الهوه...قلبي جفل مثل الحمامه
و  اتراولي  ابمهده  سهم...حته  الوساده  بيها دم...سترك يرب من هالعلامه
ناغيته  و  يصب  مدمعي...و  بلا شعور و لا وعي...عبدالله ترجع بالسلامه
شتقله   أمك  اتذكرت...نام  الحبيب  و  ما  نمت...جانت  تناغيه  ببتسامه
أتذكر    أمه    شتقول...نام    الولد   دلّلول...غالي   و   أعز   من   عيني
راح  و  صحت  يا  ستّار...لا  هدهد  ايجيب  أخبار...و  آنا الهجر ماذيني
******
كلما  يجي  وكت  الظهر...يمي  أحس يصهل مهر...و ينادي يا عالم هضيمه
و  أركض  و أباوع للسمه...لون أحمر و يمطر دمه...حته الهوه خايف نسيمه
ها  يالمهر  قلي  اشحصل...قلي  بقيت ابلا أهل...زينب تره ما عدها خيمه
خصم الكلام اتيسرت...و اضلوع أبوج اتكسرت...يعني انتي من هسه يتيمه
ظليت  أدق  اعله  الراس...لا  والدي  و  لا  عباس...حادي الحزن يحديني
شوف  الزمن  من  يندار...لا  هدهد  ايجيب  أخبار...و  آنا  الهجر ماذيني
******
ظليت أعاين عالدرب...مهضومه مكسورة قلب...لن صوت إبن حذلم أسمعه
أم  البنين  اتعنته...و  آنا  اركضت  وي  صيحته...جاوب دليلي لا تصدعه
قلي  هلج  راحوا  جتل...و  الوالد  ابلايه  غسل...مرمي و لا واحد يشيعه
قلي  و  بعد  غير  الذبح...ألف و سبعمية جرح...جسمه التوزع من يجمعه
ما  شفنه  غيره  مجتول...عاري  و  تسحقه  الخيول...و  اينادي  من  يرويني
و  العليه  صارت  طشار...لا  هدهد  ايجيب  أخبار...و  آنا  الهجر ماذيني