مكتوبه عالمنحر

 قصيدة :  مكتوبه   عالمنحر

️للشاعر : السيد عبدالخالق المحنّه

الرادود : الحاج ملا باسم الكربلائي

مكتوبه   عالمنحر...خادم   لبو   الأكبر
مسلم  هويتي  و  أفتخر ...شيعي شيعي
******
لو  جلجل  الليل  العتم  ضوي  له شمعه
و   الرايد  يجيب  الشهد  متخوفه  لسعه
هذا   العمر   ساعة  ألم  ما  يسوه  دمعه
كل  شي  يرد  بس  الشرف  محد يرجعه
الجمرة    أقبضها...و    الذلة   أرفضها
عَظم  الشرف  ما  ينكسر  شيعي شيعي
******
أندل  طريقي  و  ما تهت أعرف مصيري
تعرفني  ساحات  الحرب  سيفي  سفيري
أكتبها   بعيون   الشمس  حسين  أميري
إي  و  العلي  بس العلي يهتف ضميري
أقبل   علي  الأول...و  بغيره  ما  أقبل
لا  ساوم  و  لا  أعتذر ...شيعي شيعي
******
أشطب  عبارات  الدهر  و  أنحت  عباره
من   النحر   قطرة   دمه   تصنع  إماره
إي و القلع باب الحصن و اليحمي جاره
قصر    الخوارج   بالزعل   أقلع   جداره
لو   مية   ألف  مره...يحرقوني  و  أتذره
أرجع   موالي  و  الفكر...شيعي  شيعي
******
تملأ    تواريخ    الأمم    هاي    الروايه
من    البدايه    رافضي    حته    النهايه
مو   مسلم   المسه   الرعب   من  المنايه
آنا  الحسيني  الحيدري  و  سيف  الولايه
لا   لا   تساومني...و   الدنيه   متهمني
بالآخر    آنا    الأنتصر..شيعي   شيعي
******
إيد   الخيانه   و  الغدر  متصافح  إيدي
حب الصميده ثروتي و ذخري و رصيدي
ما   تذبح   الموقف   أبد  أذبح  وريدي
حيَّ   على  خير  العمل  ظلت  نشيدي
لا   تبقه   تتجادل...ما   أعرف  أتنازل
بركاني   يغفه  و  ينفجر...شيعي  شيعي
******
أحجيها  مره  و  كلمتي ما صارت اثنين
الماي  أتركه  و  الهوى  و ما أترك حسين
ما  تعله  عالحاجب  أبد  يالناصبي  العين
أصلي  كرامات و مجد بس أصلك امنين
دلينه   أجدادك...و   الرافضه   أسيادك
قلناها   من  أول  سطر...شيعي  شيعي
******
تكفيني    طوعه   ابغربتي   هاي   الوفيه
هاي    الغيوره    الصابره   و   الحيدريه
لجل   النبي   و  المرتضه  و  لجل  الزجيه
يا   طوعه   و   اعيونج  تره  تحله  المنيه
لو   سيفي   كلمهم...للموت  أسلمهم
سيفي   ابكلامه  يختصر...شيعي  شيعي
******
لمن   شفت  سيف  الغدر  غازل  رقبتي
إتشاهدت   و   الكربله   صارت  نظرتي
لا  و  الله  مو  من  الذبح سالت دمعتي
آنا  اعله  بن عمي يظل دمعي و حسرتي
لمن   نزف   دمي...حشّمت  ابن  عمي
راعي   العلم  ما  ينتظر...شيعي  شيعي
******
يا  با  الفضل  مسلم  تره  قطعوا  وريده
كل   منيتي   بآخر   نفس  أنظر  حميده
قلبي    يقلي    ابكربله    تبقه   وحيده
يا   بويه   جمعتنه   بعد   صارت   بعيده
لو    جيتي    مجتوفه...تلقيني    بالكوفه
يوم    القيامة    أنذكر...شيعي    شيعي