قصیدة : علمّني هالمنبر أعرف جوهر المصدر
الشاعر : السيد عبدالخالق المحنّه
الرادود : الحاج ملا باسم الکربلائی
علمّني هالمنبر...أعرف جوهر المصدر...مذهب صادق القول
يتصدر المراتب...سيد عله المذاهب...مذهب صادق القول
******
مذهب جعفري حب حيدري فكري غديري
راسخ بالعقل حب الولي و راضي بمسيري
نبضات القلب تعلن تظل حيدر أميري
إي و القل هوه بس حيدرة ساكن ضميري
مذهبنه يتصدر...دوم و قائده جعفر...عند الباري مقبول
رغماً عله النواصب...سيد عله المذاهب...مذهب صادق القول
******
مذهبنه الأصل و أهل العقل تعرف مقامه
جعفر أسسه و المدرسة سادس إمامه
و اللي ما رضه لا لا يظن اسمع كلامه
ما كو بس علي لا و العلي اليوم القيامة
لو قطعوا المنحر...أهتف حيدر و حيدر...هوه و غيره ما أقول
خل تكثر المتاعب...سيد عله المذاهب...مذهب صادق القول
******
دمي فاطمه و الحيدرة صار انتمائي
حب المصطفه و أهل العبه يجري بدمائي
آنا من المهد عاشق علي و طبعي فدائي
آنا الجعفري و الحيدري و الكربلائي
أتحده كل طاغي...ظالم ناصبي و باغي...أبقه و سيفي مسلول
ابحق مذهبي أطالب...سيد عله المذاهب...مذهب صادق القول
******
ياللي ناشدت عن الاسم افهم قضيتي
شيعي و رافضي و حب الوصي أصبح هويتي
ألهج يا علي يا با الحسن حته منيتي
رايد دفنتي بأرض النجف كاتب وصيتي
و الما رضه انرفضه...حيدر أول النهضة...قلبي العاشق ايقول
يا مذهب المناقب...سيد عله المذاهب...مذهب صادق القول
******
آنا الرافضي و حب مذهبي سيطر عليه
للحب سلمت و اتولعت ظل يسري بيه
عشقي الأولي و الآخر الحامي الحمية
و أدري بالحشر حيدر يجي للرافضية
يحضرنه حيدرنه...هوه اللي يعبرنه...حيدر عنه مسؤول
بالمحشر اليحاسب...سيد عله المذاهب...مذهب صادق القول
******
مذهب حيدرة و سيد الورة هوه البداية
بينه يبتدي بحر الوفه و بينه النهاية
احنه المرجلة بكل ملحمة مرفوعة راية
ملعون النكر حامي الحمه و عاف الولاية
أشهد بأبو الكاظم...لا ما صافح الظالم...غيري يبقه مذلول
و الينحر المصاعب...سيد عله المذاهب...مذهب صادق القول
******
ياللي سافرت لرض الغري احمل سلامي
و احمل دمعتي و كل لهفتي الجعفر إمامي
قله اعله العهد لآخر النفس آخر كلامي
و احمل حسرتي لزيارته و احمل هيامي
يالقبرك اتهدم...لازم ننصب المأتم...قلب الشيعي معلول
خل تهتف المواكب...سيد عله المذاهب...مذهب صادق القول
play_arrow
play_arrow
play_arrow
play_arrow
play_arrow
play_arrow
تعليقات