بنت البتول
باسم الكربلائي
القصيدة : بنت البتول
الشاعر : الأدیب جابر الکاظمی
الرادود : الحاج ملا باسم الكربلائی
اصدار : وحي القوافي محرم 1427
بنت البتول الشافعة
لإبن الوديعة تودعه
بين الخيم صرخة ألم
ضلع أمك اليوم انهشم
******
بدرين واحد بالأرض
و الثاني بأعنان السما
رغم الضوى و رغم الشعاع
اللي يشع هالدنيا أمست مظلمة
ليل و سكون ووحشة يرسمها
الدمع انجمعن ودايع فاطمة
بلهفة وداع و جمرة گلوبو ضمى و بين
ايد أخوها اتماثلت أم الخدر و اتكلمه
و شتكلمه لاهو صبر لاهو بچي
و لا هية سكتة و لا چلمة
تحچي ويا أخوها بالإشارة و الوِمة
و تقول له روحي غالغصص متعلمة
بين ايدك اشعر گلبي يا حسين ارتمى
چني اسمع ناعي نعى
و لوّح نذير الفاجعة
بوجهي انشهر سيف القهر
سلّمت روحي للعدم
******
وداعك جمر لا بل أحر من الجمر
يبن أمي بس هالليلة
ماظلت سواها بالعمر
و من يجزي هذا الليل و الأبيض يطر
تتفتح باب جروحك
و تتغلق أبواب الصبر
و اصرخ إذا جسمك البيض توذِّره
و راسك على روس السمر
أصرخ صريخ الثاچلة الماتدري
تمشي اليا كتر
اليوم افقدت جدي النبي
اليوم انطبر فارس بدر
و اليوم بالباب انهشم
ضلع أمك الزهرة الطهر
و الليل آه الليل و همومه اشكثر
من يجزي هذا اليوم و الأبيض يطر
أنظر جثث متبضّعة
بالمشرفية موزّعة
و الدم يصب فوق الترب
تصنع عواميد الشيم
******
ويلاه يا ليل الكدر ويلاه يا ظيم الدهر
ويلاه يا گلبي اشكثر تحمل قهر
يبن أمي لو شفتك
ذبيح و عالغبرة جسمك
من يطيح و لو عاينت دمك يسيح
و ينزف مصبه من النحر
عالتل أجيك اصرخ و اصيح
انْهَض يبن هيبة مضر
ادرك خواتك خوية داهمها الخطر
هجمت خيول بلا عدد جمر
و الجمر بخيمنا استعر
و كل حافر يسحج طفل يذكرني
بضلع امنا الوديعة من انكسر
بين الحريم اللايعة
يبن اليتامى الفازعة
أبدي الورع و بلا جزع
أتوزّم بدمعي الحرم
******
يبن أمي بعيونك شفت
كل حرف من وصيتك
عن رگبتك باچر ياخوية
بالدمع أغسل نزف دم رگبتك
عن جثتك گلبي احفره
و بالگلب أدفن ياخوية جثتك
عن عيلتك لو حرقوا عليها
الخيم دلالي خيمة لعيلتك
باچر لَوَن تريب و فوق الترب
جسمك سليب ما أگطع عليك النحيب
بكب دمعي أبچي لفرقتك
آنة الغريبة يالغريب
حرقتني جمرة لوعتك
باچر خواتك هارعة
بهاي الصحاري الشاسعة
من ينشهر سيف الغدر
تتقطع بنود اليمم
المرسل:
الأربعاء, 23 كانون1/ديسمبر 2020
