يالقاصد لقبر حسين اوقف وانحني ببابه

يالقاصد

يالقاصد لقبر حسين ... اوقف وانـحني ببابه
وهل دمعك على الخدين ... واسجد قبّل اعتابه
---------------------------
يالزاير لَوَن كبرة يلوح لعينك من بعيد ... سلّم واعقد النيّة واقرة الحمد والتوحيد
واطلب من ابو السجاد كلما تطلب وشتريد
اصعب واكلف الحاجات ... عندة بكل وكت سهلات ... وطبع الرزق بالنيات
وكل مطلب وسيلة يريد وكل موقف إلة سبابة
عن حسين ابو اليمة يالسامع خبر مشهور ... يتناقل بكل مجلس وبكل الكتب مذكور
كلمن يعتني يزورة يرد منة بكلب مسرور
بكبرة تبرة اللهفة ... وجمرة حسرتك تطفة ... اذا عندك مرض تشفة
تبرد علتة ويطيب كلمن يشتم ترابة
لا تخلي العجب والشك مابينك وبينة يحول ... لو همك جبل ينزال وبفضل الحسين يزول
بكرامة خصصة الباري الدعاء بكبتة مقبول
ومن تتوجه بدعواك ... يالزاير اريد انخاك ... اريدك تندعيلي وياك
لتربت كربلا حنيت دموع الغربة سجابة
يزاير لورحت انخاك لمن توصل لكبرة ... عوض عني اريد تشم مكان البيه نزف نـحرة
اختنكت ريتي وحنيت يايوم الاشم عطرة
وكلة خادمك ودة ... ينال المطلب العندة ... وكلبة ببابك يشدة
علق لو حصل مرادة يرد يـمك من غيابة
نذر لحسين لو رديت ناذر اعتنيلة زحوف ... كلبي يسبكـ اجدامي وبكبرة ابو اليمة يطوف
واحني ضلوعي عالشباج واحضة بلوعة الملهوف
واشكي شعندي من الام ... وخبرة بدورة الايام ... وازور الاكبر وجسّام
كبل ما ودع ابو اليمة ازور اهل الوفة اصحابة
واتعنة لعضيد حسين عباس الاخو الوفاي ... لكبلة ما قبل يشرب ويتهنة بلذيذ الماي
واكلة من كبر زينب جايبلك سلامي وياي
غيور اطباعة معرفة ... كريـم يـحيي بضيوفة ... اعذرة مكطعة جفوف
وراسة بالعمد مهشوم وبعينة السهم صابة
كضيت العمر واتـمنى اعيش بـحلم وبآمال ... لو يدنة الاجل مني نعشي بكربلا ينشال
يفروني على كبر حسين وشعندي ذنب ينـزال
بـجاهة الطاهرة امة ... اريدن دفنتي يـمة ...وآنة خادم لبو اليمة
حي ميت دليلي يصيح آه يا حسين ومصابة